Uładzisłaŭ Makaviecki sa svajoj samaj znakamitaj pracaj-łyžkaj z duba daŭžynioj bolš za 23 mietry, jakuju zrabiŭ u suaŭtarstvie z dvuma majstrami ŭ Bierazino Minskaj vobłaści. Fota «Mahiloŭskija viedamaści»
Sud Kastryčnickaha rajona Viciebska 16 śniežnia prysudziŭ 27-hadovaha raźbiara pa drevie Uładzisłava Makavieckaha, jakoha abvinavačvali ŭ hvałcie abo pahrozie hvałtu ŭ dačynieńni da supracoŭnikaŭ milicyi, da 2 hadoŭ kałonii ahulnaha režymu, piša Tut.by.
Praces viała sudździa Śniažana Kindziejeva. Prakuror u sudovych sprečkach nastojvaŭ na tym, što padčas niesankcyjanavanaha vuličnaha šeścia ŭ Viciebsku 6 vieraśnia Uładzisłaŭ Makaviecki padabraŭ humovuju dubinku i metanakiravana razmachvaŭ joju ŭ bok milicyjaniera Alaksandra Piatroŭskaha, schapiŭ jaho za ruki i pryčyniŭ jamu fizičny bol, a taksama vusna pahražaŭ jamu.
Dziaržabvinavaŭca zapatrabavaŭ dla maładoha čałavieka 3 hady kałonii. Jamu ŭ vyniku dali dva hady.
Advakat Uładzisłava Makavieckaha zajaviła, što vinu jaje padabaronnaha sudovaje śledstva nie dakazała i što ŭ jaho dziejańniach niama składu złačynstva. Abvinavačvańnie nie znajšło śviedak, jakija paćvierdzili b, što Makaviecki pahražaŭ milicyjantam.
U apošnim słovie Uładzisłaŭ Makaviecki adznačyŭ, što nie pryčyniŭ nikomu škody.
Paciarpiełyja milicyjanty — małodšy siaržant Alaksandr Piatroŭski i staršy siaržant Dźmitryj Fiadotaŭ — zapatrabavali kampiensacyju maralnaj škody (adpaviedna 500 i 200 rubloŭ). Hetyja hrošy jany ŭžo atrymali.
Heta ŭžo čaćviorty praces u Viciebsku pa kryminalnych spravach, zaviedzienych suprać udzielnikaŭ vuličnych mitynhaŭ, abvinavačanych u hvałcie ŭ dačynieńni da supracoŭnikaŭ milicyi i słužbovych asob (artykuły 364 i 366 KK).
Da 2,5 hoda kałonii prysudzili prahramista Alaksandra Kirylenku, ramieśnika Andreja Cimafiejenku — da 2 hadoŭ kałonii. Samy surovy prysud u Aleha Jafremienki — 4,5 hoda pazbaŭleńnia voli
