U prezidenta Rasii Uładzimira Pucina niama dvuch adnolkavych kabinietaŭ u sočynskaj i padmaskoŭnaj rezidencyjach. Pra heta paviedamiŭ pres-sakratar prezidenta Rasii Dźmitryj Piaskoŭ, piša RBK.
«Nijakich adnolkavych kabinietaŭ niama, u prezidenta šmat kabinietaŭ u roznych haradach, jon imi karystajecca, i vy ŭsio heta bačycie», — zajaviŭ jon.
Raniej vydańnie «Prajekt» sa spasyłkaj na krynicy i źviestki palotaŭ prezidenckaha borta paviedamiła, što z kanca leta rasijski lidar pracuje ŭ Sočy, choć Kreml śćviardžaje, što jon znachodzicca ŭ padmaskoŭnym Nova-Aharovie. Surazmoŭcy vydańnia rastłumačyli, što takim čynam ułady chočuć zymitavać blizkaść prezidenta da narodu padčas druhoj chvali karanavirusnaj infiekcyi.
Piaskoŭ nazvaŭ paviedamleńni ab kabinietach-dvajnikach častkaj infarmacyjnaj ataki i adznačyŭ, što miescaznachodžańnie kiraŭnika krainy źjaŭlajecca dziaržaŭnaj tajamnicaj. Kamientujučy publikacyi ŭ ŚMI, pres-sakratar adznačyŭ, što samaloty z parka kiraŭnictva krainy stajać u roznych haradach.
Uletku Pucin pakazaŭ žurnalistam, što znachodzicca za dźviaryma jahonaha pracoŭnaha kabinieta ŭ Kramli. U susiednich pamiaškańniach raźmieščany stałovaja i pakoj adpačynku.
