Eŭrapiejski parlament na svaim pasiadžeńni 26 listapada pryniaŭ rezalucyju ŭ suviazi ź niaspynnymi parušeńniami pravoŭ čałavieka ŭ Biełarusi i, u pryvatnaści, z zabojstvam Ramana Bandarenki, piša Radyjo Svaboda.
Jaje padtrymali pradstaŭniki ŭsich palityčnych hrupaŭ Eŭraparlamentu, aprača pravaradykalnaj hrupy «Identyčnaść i demakratyja» i levaradykalnaj hrupy «Abjadnanyja eŭrapiejskija levyja / Zialonyja levyja Poŭnačy».
Za pryniaćcie rezalucyi prahałasavali 613 deputataŭ, suprać — 41, ustrymalisia 35 eŭraparlamentaroŭ.
«Ja vychodžu!» Deputaty Jeŭraparłamienta pačynali svaje vystupy sa słoŭ Ramana Bandarenki
U rezalucyi apisvajecca sytuacyja ŭ Biełarusi i raniejšyja rašeńni mižnarodnych arhanizacyj. Zychodziačy z hetaha, Eŭraparlament sfarmulavaŭ nastupnyja 26 punktaŭ, u jakich:
- Samym rašučym čynam asudžaje zabojstva Ramana Bandarenki i vykazvaje spačuvańnie jaho siamji i siemjam usich, chto straciŭ svaich blizkich u vyniku represijaŭ z boku režymu Łukašenki.
- Patrabuje nieadkładnaha, pilnaha, biesstarońniaha i niezaležnaha raśśledavańnia śmierci Ramana Bandarenki i źviazanych z pratestami śmierciaŭ Alaksandra Tarajkoŭskaha, Alaksandra Vichora, Arcioma Parukava, Hienadzia Šutava i Kanstancina Šyšmakova.
- Znoŭ vykazvaje padtrymku biełaruskim pratestoŭcam u ich patrabavańniach svabody, demakratyi, hodnaści i prava abirać svoj ułasny los; asudžaje niaspynnyja parušeńni pravoŭ čałavieka, zapałochvańnie i niepraparcyjnaje ŭžyvańnie siły suprać mirnych pratestoŭcaŭ.
- Zaklikaje biełaruskija ŭłady spynić usie formy hvałtu, žorstkaha abychodžańnia, hienderna-bazavanaha hvałtu i katavańniaŭ suprać biełaruskich hramadzian i zatrymanych, dać im dostup da medyčnaj i jurydyčnaj dapamohi, a taksama vyzvalić nieadkładna i biezumoŭna ŭsich asobaŭ, jakija byli advolna zatrymanyja, u tym liku za ŭdzieł u pratestach suprać vynikaŭ vybaraŭ i suprać hvałtu z boku ŭładaŭ, abo za vykazvańnie padtrymki hetym pratestam.
- Rašuča asudžaje luboje vykarystańnie zapałochvańnia, pieraśledu, advolnych aryštaŭ i zatrymańniaŭ, žorstkaha abychodžańnia z hramadzianami, i asudžaje parušeńni pravoŭ čałavieka z boku biełaruskich uładaŭ abo ad ich imia; zaklikaje nieadkładna spynić usie formy pieraśledu hramadzian, takija jak zvalnieńnie pracoŭnych i vyklučeńnie studentaŭ za ŭdzieł u strajkach ci pratestach, pazbaŭleńnie žurnalisckaj akredytacyi, karnaje adklučeńnie kamunalnych pasłuh, takich jak vada ci aciapleńnie, pazbaŭleńnie pravoŭ na apieku nad dziciem, blakavańnie pryvatnych bankaŭskich rachunkaŭ i adklučeńnie internetu.
- Zaklikaje ŭsich biełaruskich supracoŭnikaŭ pravaachoŭnych orhanaŭ i ŭsich, chto dziejničaje ad imia biełaruskich uładaŭ, nieadkładna spynić vykarystańnie hvałtu suprać mirnych hramadzian i ŭstrymacca ad vykanańnia dalejšych złačynnych zahadaŭ i instrukcyj pa vykarystańni dyspraparcyjnaj siły, hvałtu, katavańniaŭ i žorstkaha abychodžańnia z hramadzianami; zaklikaje ŭvieści kankretnaje vyznačeńnie katavańniaŭ u Kryminalny kodeks Biełarusi ŭ adpaviednaści ź mižnarodnymi standartami pravoŭ čałavieka i źmianić zakanadaŭstva takim čynam, kab kryminalizavać prymusovyja źniknieńni.
- Asudžaje poŭnaje niežadańnie ŭładaŭ raśśledavać vypadki žorstkaha abychodžańnia i katavańniaŭ z boku pravaachoŭnikaŭ, u toj čas jak zavodziacca kryminalnyja spravy suprać mirnych hramadzian; padkreślivaje, što heta śviedčyć pra naŭmysnuju i systematyčnuju palityku represij i biespakaranaści, jakuju jašče bolš padkreślivaje toj fakt, što zadziejničanyja ŭ hetym supracoŭniki milicyi i specsłužbaŭ praciahvajuć atrymlivać vysokija ŭznaharody za svoj udzieł u złačynstvach suprać narodu.
- Nie pryznaje vynikaŭ tak zvanych prezydenckich vybaraŭ 9 žniŭnia 2020 hodu i vykazvaje svaju adnaznačnuju padtrymku narodu Biełarusi ŭ jaho zakonnych patrabavańniach nieadkładnaha spynieńnia aŭtarytarnych represijaŭ, pavahi da fundamentalnych svabodaŭ i pravoŭ čałavieka, praviadzieńnia novych, svabodnych i spraviadlivych vybaraŭ u adpaviednaści ź mižnarodnymi standartami i pad nazirańniem Ofisa ABSE pa demakratyčnych instytutach i pravach čałavieka.
- Zaklikaje ŭsie firmy, jakija pracujuć u Biełarusi, prajaŭlać asablivuju pilnaść i vykonvać svaje abaviazańni adnosna pavahi da pravoŭ čałavieka ŭ adpaviednaści z pryncypami AAN datyčna biznesu i pravoŭ čałavieka.
- Nastojvaje na nieabchodnaści zabiaśpiečyć prava hramadzian na svabodu schodaŭ, asacyjacyj, vykazvańniaŭ i dumak, a taksama svabodu medyja, i tamu źniać usie abmiežavańni ŭ zakonie i na praktycy, jakija pieraškadžajuć hetym svabodam.
- Znoŭ padkreślivaje važnaść ustalavańnia viaršenstva zakonu, kab pavažalisia asnoŭnyja svabody i pravy čałavieka, a taksama kab była dziejnaja niezaležnaja sudovaja ŭłada, što harantavała b prava na advakata, spraviadlivy sud i jurydyčnuju dapamohu.
- Rašuča asudžaje praciah vykarystańnia śmiarotnaha pakarańnia i zaklikaje da jaho nieadkładnaj i stałaj admieny, a pakul hetaha nie adbudziecca, da maratoryju na śmiarotnaje pakarańnie i da efektyŭnaha prava apelacyi suprać śmiarotnych pakarańniaŭ.
- Zaklikaje EZ padtrymać mižnarodnaje raśśledavańnie złačynstvaŭ režymu Łukašenki suprać narodu Biełarusi; ličyć, što takoje raśśledavańnie treba padtrymać stvareńniem centru pa zbory dokazaŭ i rabočaj hrupy Eŭraźviazu z ekspertaŭ u mižnarodnym pravie, jakaja b sadziejničała budučym mižnarodnym raśśledavańniam. Zaklikaje Eŭrakamisiju, krainy Eŭraźviazu i Eŭrapiejskuju słužbu vonkavych dziejańniaŭ dać poŭnuju padtrymku namahańniam Rady AAN u pravach čałavieka i Maskoŭskaha mechanizmu ABSE, a taksama pravaabaroncaŭ i hramadzianskaj supolnaści, kab zabiaśpiečyć dakumentavańnie i paviedamleńnie pra parušeńni pravoŭ čałavieka i, u dalejšym, adkaznaść vinavatych i spraviadlivaść dla achviaraŭ.
- Asudžaje dziejańni Nacyjanalnaha schodu Biełarusi ŭ pazbaŭleńni hramadzian biełaruskaha hramadzianstva z palityčnych pryčyn.
- Asudžaje pieraśled žančyn-pravaabaroncaŭ, u pryvatnaści aryšty Marfy Rabkovaj i Maryny Kastylančanki z pravaabarončaha centru «Viasna», i zaklikaje nieadkładna spynić hienderna-bazavany pieraśled aktyvistak.
- Ličyć, što ŭručeńnie premii Sacharava za svabodu dumki — 2020 demakratyčnaj apazycyi Biełarusi pakul moža adbycca ŭ formie dystancyjnaj cyrymonii, u suviazi z pandemijaj. Adnak padkreślivaje, što fizyčnaja cyrymonija pavinna być arhanizavanaja, kali heta dazvolić sytuacyja.
- Padkreślivaje, što zachady, užytyja Eŭraźviazam i jaho krainami-ŭdzielnicami suprać režymu Łukašenki, dahetul byli niedastatkovyja, i vitaje rašeńnie Eŭrapiejskaj rady ab pracy nad trecim pakietam sankcyj, skiravanych suprać firmaŭ i aliharchaŭ, źviazanych z režymam Łukašenki. Zaklikaje da vartaha davieru pašyreńnia śpisu sankcyjaŭ EZ.
- Padtrymlivaje stvareńnie nieadkładnaj misii Eŭrapiejskaha parlamentu ŭ Vilniu i Varšavu dla vyśviatleńnia faktaŭ, a taksama kamunikacyju z apazycyjaj u Biełarusi, kab vyśvietlić mahčymaści pasiarednictva i inicyjatyvaŭ u padtrymku demakratyi. Padkreślivaje nieabchodnaść dalejšaha pasiarednictva i inicyjatyvaŭ u padtrymku demakratyi, takich jak Misija vysokaha ŭzroŭniu, jakaja b śledavała za misijaj dla vyśviatleńnia faktaŭ.
- Zaklikaje da poŭnaha zamarožvańnia ŭsich transferaŭ fondaŭ Eŭraźviazu, u tym liku pazykaŭ Eŭrapiejskaha banku investycyj, Eŭrapiejskaha banku rekanstrukcyi i raźvićcia dy inšych dla ciapierašniaha biełaruskaha ŭradu i prajektaŭ pad dziaržaŭnym kantrolem. Zaklikaje Eŭrapiejskuju słužbu vonkavych dziejańniaŭ prypynić pieramovy ab pryjarytetach partnerstva EZ-Biełaruś, pakul nie adbuducca svabodnyja i spraviadlivyja prezydenckija vybary.
- Zaklikaje EZ i krainy Eŭraźviazu pavialičyć dapamohu biełaruskaj hramadzianskaj supolnaści i pavialičyć kantakty EZ i padtrymku niezaležnych arhanizacyj hramadzianskaj supolnaści, pravaabaroncaŭ i niezaležnych žurnalistaŭ, asabliva tych, chto ŭ źniavoleńni, adsočvajučy ich sudovyja pracesy. Zaklikaje Eŭrakamisiju nieadkładna stvaryć prahramu stypendyj dla studentaŭ i navukoŭcaŭ, vyklučanych ź biełaruskich universytetaŭ za ich prademakratyčnuju pazycyju. Zaklikaje Eŭrakamisiju zapuścić metavuju prahramu dapamohi EZ, kab dapamahčy achviaram palityčnych represij i palicejskaha hvałtu.
- Asudžaje vysyłku eŭrapiejskich dyplamataŭ ź Biełarusi i zaklikaje EZ i krainy Eŭraźviazu razhledzieć mahčymaść panizić uzrovień dyplamatyčnaha ŭzajemadziejańnia z krainaj.
- Zaklikaje krainy Eŭraźviazu i Eŭrakamisiju ažyćciavić rekamendacyi dakładčyka Maskoŭskaha mechanizmu ABSE, kab dać prytułak u vypadkach pieraśledu, praduhledžanych Ženeŭskaj kanvencyjaj ab statusie ŭciekačoŭ. Zaachvočvaje krainy Eŭraźviazu ŭ hetym kantekście dalej spryjać pracedury atrymańnia vizaŭ dla tych, chto ŭciakaje ź Biełarusi z palityčnych pryčyn, i zabiaśpiečyć im i ich siemjam usiu nieabchodnuju padtrymku i dapamohu.
- Asudžaje zdušeńnie medyja i dostupu da internetu, pašyreńnie dezynfarmacyi i źbivańnie, aryšty i zapałochvańnie žurnalistaŭ i błohieraŭ. Padkreślivaje prava narodu Biełarusi mieć bieśpieraškodny dostup da infarmacyi. Zaklikaje EZ skarystacca svaimi instrumentami, kab padtrymać ŚMI i žurnalistaŭ, jakija trapili pad pieraśled režymu.
- Nastojvaje, što biełaruskija pracoŭnyja pavinny mieć mahčymaść skarystacca svaim pravam na mirny strajk biaz ryzyki zvalnieńnia, aryštu ci inšych pakarańniaŭ.
- Paŭtaraje svoj zaklik da Eŭrapiejskaj rady i Eŭrakamisii pryniać usioachopnyja efektyŭnyja i svoječasovyja abmiežavalnyja zachady na ŭzroŭni EZ, tak zvany Eŭrapiejski akt Mahnickaha, jaki b dazvoliŭ sankcyi suprać luboj asoby, dziaržaŭnych i niedziaržaŭnych subjektaŭ i lubych inšych subjektaŭ, jakija adkaznyja za ciažkija parušeńni pravoŭ čałavieka, złoŭžyvańni i karupcyju ci majuć da ich dačynieńnie, bieź nijakaha dalejšaha adkładu.
- Instruktuje staršyniu Eŭraparlamentu pieradać rezalucyju ŭ Eŭrapiejskuju radu, u Eŭrakamisiju, vice-prezydentu Eŭrakamisii / Vysokamu pradstaŭniku Eŭraźviazu ŭ zamiežnych spravach i palitycy biaśpieki, uradam i parlamentam krain Eŭraźviazu, Arhanizacyi biaśpieki i supracoŭnictva ŭ Eŭropie i ŭładam Respubliki Biełaruś.
0
0
0
0
0
0