Viarnucca Aleh Małaščanka ŭ Biełaruś zmoža tolki praz try hady, piša Intex-Press.
Aleh i Taćciana Małaščanka.
Žychara Baranavič, vajskovaha piensijaniera Aleha Małaščanku 25 listapada zaprasili ŭ adździaleńnie pa hramadzianstvie i mihracyi Baranavickaha HAUS dla abmierkavańnia rašeńnia ab jaho vysyłcy z krainy, raspaviała Intex-press jahonaja žonka Taćciana. Uviečary ŭ siabie na staroncy ŭ fejsbuku Aleh Małaščanka pakinuŭ paviedamleńnie: «Vysyłka z krainy, biez prava ŭjezdu na try hady, pakinuć krainu da 25.12.2020».
Na abskardžańnie rašeńnia adździaleńnia pa hramadzianstvie i mihracyi Baranavickaha HAUS u siamji Małaščankaŭ jość try dni, skazała Intex-press Taćciana.
Aleh Małaščanka — uradženiec Baranavič. Ź siamjoj jon žyvie ŭ horadzie z 2004 hoda. U jaho dvoje niepaŭnaletnich dziaciej, žonka i 85-hadovaja maci. Mužčyna — były aficer, zakančvaŭ vajennuju słužbu ŭ Rasii, tamu aŭtamatyčna atrymaŭ rasijskaje hramadzianstva. Paśla słužby pierajechaŭ na radzimu, niekalki hadoŭ byŭ uładalnikam kramy «Vadzianik», a paźniej uładkavaŭsia pracavać na avijazavod.
Siamja Małaščankaŭ aktyŭna ŭdzielničaje ŭ hramadskim žyćci horada. Jany damahlisia adkryćcia ŭ horadzie biełaruskamoŭnych kłasaŭ, udzielničali ŭ nacyjanalnych prajektach i papularyzacyi biełaruskaj kultury, nieadnarazova byli naziralnikami na vybarach.
Na dumku žonki Aleha, Taćciany Małaščanka, muža chočuć vysłać z krainy z-za taho, što ŭłady ličać mužčynu adnym z zavadataraŭ pratestaŭ u AAT «558 avijacyjny ramontny zavod», jakija prajšli paśla prezidenckich vybaraŭ.
— My, viadoma, spadziavalisia na lepšaje, ale iluzij ab tym, što muža pakinuć u Biełarusi, ja nie mieła. Mianie ździviła, što Aleha vysyłajuć z krainy ŭ dobraachvotnym paradku, a nie prymusova. Tak što nam nie daviadziecca źbirać rečy prychapkam, — raspaviała Taćciana Małaščanka.
Pa cłovam Taćciany, u adździaleńni pa hramadzianstvie i mihracyi Baranavickaha HAUS Alehu nie vydali kopiju dakumienta, u jakim napisana dakładnaja pryčyna departacyi, i taksama nie dali jaho sfatahrafavać. Małaščanka pry aznajamleńni z dakumientam paśpieŭ pračytać, što adnoj z pryčyn departacyi byŭ udzieł u akcyjach pratestu.
Siamju Małaščankaŭ ciapier vielmi niepakoić toje, što z-za vysyłki na try hady z krainy Aleh moža bolš nie ŭbačyć svaju sastarełuju maci.
— Žančynie 85 hadoŭ, a vysyłka na try hady biez prava na ŭjezd — heta ŭsio ž termin dla piensijaniera, — pieražyvaje Taćciana.
