Minčuki za try dni pryvieźli ŭ Novuju Baravuju sotni, kali nie tysiačy butelek z vadoj
U «Novaj Baravoj» adnavili padaču chałodnaj i haračaj vady.
U čacie NB pišuć, što na niekatorych vulicach napor dobry, niedzie słabiejšy, i vada pakul z prymieškaj iržavaha koleru, ale idzie.
Vada źjaviłasia pad ranicu «Pakul nie ryzykujem jaje pić, čakajem, ale rady», — pišuć u čacie. Inšyja ŭ adnoj z kvater paćvierdzili infarmacyju ź miascovych čataŭ.
Nahadajem, haračaja i chałodnaja vada adsutničała ŭ Novaj Baravoj z 15 listapada.
Raniej vykazvałasia mierkavańnie, što adklučeńnie vady — heta pomsta žycharam mikrarajona za pratestnyja nastroi i bieły-čyrvona-biełyja ściahi na voknach.
Učora ŭ Novaj Baravoj prapała na paru hadzin aciapleńnie. A ŭ aŭtorak u škole admianili zaniatki.
Cikava, što čat salidarnaści z Novaj Baravoj za sutki sabraŭ 19 tysiač udzielnikaŭ. Ludzi prapanoŭvali svaje kvatery, kab žychary rajona pamylisia, pamyli adzieńnie, pieranačavali, prapanoŭvali abahravalniki. Hetyja dni vazili ŭ Novuju Baravuju butelki z vadoj. Minčuki prajavili vielizarnuju salidarnaść.
«Rabiaty, vy vystajali! Jašče adnym prykładam mocy duchu i salidarnaści stała ŭ našaj novaj Biełarusi bolš!» — pišuć u čacie.
Admietna, što na prablemu ŭčora «źviarnuŭ uvahu» i Łukašenka, jaki zahadaŭ razabracca Kačanavaj i Barsukovu.
