Kalvaryjskaja vieža stała simvałam kulturna-dziełavoha kvartała «K21» na miescy byłoj vytvorčaści «Minskdreŭ». Zabudoŭščyk uziaŭsia viarnuć da žyćcia ŭzor industryjalnaj paślavajennaj architektury, ale asučaśnić jaho modnaj urbanistyčnaj kancepcyjaj. Struchlełyja cechi adviali pad ofisy, kramy i restarany, a dvarovuju prastoru pieratvarajuć u miesca dla adpačynku, vuličnaj ježy, kancertaŭ i vystaŭ. Restaŭracyja idzie bolš za paŭhoda i jašče nie zavieršana całkam.
Raniej ŭ viežy raźmiaščałasia liftavaja šachta, pa jakoj vazili draŭninu i hatovuju meblu. Ciapier tut znachodzicca leśvica, a častku prastory zaniała tancavalnaja škoła. Vyšynia Kalvaryjskaj viežy dasiahaje 18 mietraŭ, a jaje vierchavinu ŭpryhožvaje vialiki hadzińnik z cyfierbłatam dyjamietram u paŭtara mietra. Na viežu ŭźniali fluhier — pieŭnia ručnoj raboty.
Pry restaŭracyi vykarystanyja cehła i mietał, jakija zastalisia ad karpusoŭ byłoha meblevaha zavoda. Vieža atrymała novy dach z kieramičnaj čarapicy i pad inšym vuhłom nachiłu. Źjavilisia piłony, a ŭsiu kanstrukcyju źlohku prypadniali.
Hadzińnik stvaryli ŭ biełaruskaj majsterni, vyrabiŭšy ŭsie miechaničnyja častki: cyfierbłat, strełki i pavarotny miechanizm. A voś vysokadakładnaja elektronika pryjechała ź Italii. Dla nadziejnaści hadziny sinchranizujuć čas praź internet, a pracavać mohuć navat u surovy choład - da 40 hradusaŭ marozu.
Nieŭzabavie ŭ kvartale «K-21» źjavicca jašče adna vieža — va ŭnutranym dvoryku. Ciapier nad joj pracujuć budaŭniki. Jana budzie vyšej — vyciahniecca na 22 mietry, a zamiest cehły vykarystoŭvajuć bieton. Unutry raźmieścicca kafe abo nievialiki mahazin, a zvonku ŭstalujuć viežavy hadzińnik.
