Alehu K. 43 hady, apošnija dvaccać hadoŭ jon addaŭ IT-śfiery. Byŭ adnym ź pijanieraŭ hetaj industryi ŭ Biełarusi, pisaŭ hulni, kali byŭ jašče školnikam. «Ja pačynaŭ, kali ajcišniki zarablali mienš za zavadčan», — śmiajecca Aleh.
26 kastryčnika Aleh razam sa svajoj dziaŭčynaj pryjechaŭ na akcyju salidarnaści da Parka vysokich technałohij na Kupreviča. Mašynu mužčyna pryparkavaŭ prykładna ŭ 12:55, a ŭžo mienš čym praź dziesiać chvilin byŭ zatrymany.
Nastupstvy zatrymańnia la PVT
«Nidzie ja navat nie paśpieŭ pikietavać, pieršaje, što pačuŭ ad ludziej: «Biažyć AMAP». My byli ŭ takoj lesapałasie kala fłahštokaŭ, spačatku było, moža, čałaviek 200, moža, 300. Ale ludzi kinulisia ŭ rassypnuju, ja jašče kryčaŭ, kab nie biehli. U vyniku tam zastałosia čałaviek 10. Maja dziaŭčyna zrabiła vyhlad, što havoryć pa telefonie z zakazčykam, tamu jaje nichto nie čapaŭ. Ja spačatku zdymaŭ usio na fota, a potym staŭ zdymać videa.
Na adnym ź videa vidać, jak amapaviec źjaviŭsia z-za dreva i streliŭ litaralna va ŭpor u mianie sihnalnaj rakietaj [na videa momant strełu bačny jak čyrvonaja kropačka ŭ rukach amapaŭca — «NN»]. Ja hladzieŭ krychu nie ŭ toj bok, tamu nie ŭsprymaŭ jaho jak pahrozu, navat nie paśpieŭ zrabić paru krokaŭ nazad ci ŭbok», — raskazvaje Aleh.
«Toj samy amapaviec potym nakinuŭsia na mianie, pavaliŭ, da jaho padbieh inšy. Ja skinuŭ amapaŭca, uskočyŭ na nohi, u hety momant ja vyrašyŭ vykinuć telefon. Ale tak atrymałasia, što telefon palacieŭ roŭna-roŭna ŭ fłahštok, udaryŭsia ŭ jaho i adrykašeciŭ. Kali mianie ciahnuli, to jašče nadavali pa nyrkach, mabyć, nahami. Jany ŭsio jašče praciahvajuć baleć. Mianie ciahnuli nie tamu, što ja ŭpiraŭsia, a tamu, što nie moh iści», — raskazvaje mužčyna.
Z PVT zatrymanych płanavali vieźci ŭ Pieršamajskaje RUUS, viadomaje svaimi krutymi noravami, ale ludzi błakavali darohi, stvarali zatory i nie davali mahčymaści tudy prajechać. «Źbiralisia vieźci ŭ Zavodskaje RUUS, ała tam skazali, što zatrymanyja im nie treba. U vyniku pavieźli ŭ Leninskaje. Tam usich vyvieli z busika i pakinuli mianie adnaho. Zapatrabavali, kab ja razbłakavaŭ telefon, maŭlaŭ, kali jaho vykidvaŭ, to niešta zabaronienaje dakładna jość. Pytalisia, ci ŭdzielničaŭ ja ŭ maršach, kažu, hladzicie, tam usio jość. A ci byŭ 9 žniŭnia? Kažu, nie byŭ, siadzieŭ doma i aburaŭsia. Mnie zdajecca, što jany šukajuć niejkich arhanizataraŭ, niejkuju sakretnuju infarmacyju, ale pakolki ničoha nie znajšli, to paviali ŭ pastarunak».
Aleh raskazvaje, što ŭ milicyi da jaho stavilisia bolš-mienš narmalna, chtości z supracoŭnikaŭ vyklikaŭ chutkuju dapamohu, kali pabačyŭ, što kurtka ŭsia parvanaja ad strełu i ŭ cełym jon adčuvaje siabie nie duža dobra. Chutkaj nie było kala 2,5 hadziny, bo bryhada była na kavidnych vyklikach. Uvieś hety čas Aleh prastajaŭ na nahach. Da jaho časta padychodzili supracoŭniki milicyi, ale kali čuli, što chutkaja ŭžo vyklikanaja, to hublali intares.
Prykładna a 6-j viečara mužčynu zavieźli ŭ Balnicu chutkaj dapamohi. «U mianie apiok 2% cieła, ceły tydzień znachodziŭsia na abiazbolvajučych, bieź ich było b vielmi ciažka. Pastajanna jeździŭ na pieraviazki, usio jašče nie zažyło».
U daviedcy było zapisana: «Šmatlikija askołačnyja ahniastrelnyja ranieńni ŭ vobłaści hrudziej i plača, termičny kantaktny apiok».
Tym nie mienš Aleha adpuścili dadomu. Na nastupny ranak jamu patelefanavali ź Pieršamajskaha RUUS z pytańniem pra ahniastrelnuju rana, maŭlaŭ, my b chacieli rasśledavać spravu i daznacca, chto ŭ vas stralaŭ. Ajcišnik na heta raśśmiaŭsia i skazaŭ, što viedaje, chto stralaŭ. Milicyjaniery ździvilisia, ale vysłuchali historyju, praŭda, paśla hetaha ŭžo nie pierazvońvali.
Paśla ŭsiaho hetaha Aleha jašče i sudzili. Praces byŭ pryznačany na 5 listapada ŭ sudzie Leninskaha rajona. U sud mužčyna pryjšoŭ u tym samym adzieńni, u jakim byŭ na momant zatrymańnia, u parvanaj kurtcy, jakaja jašče pachła poracham. Na sudzie ad milicyi vystupaŭ śviedka «Zajcaŭ S. N.», jaki navat nie viedaŭ, dzie dakładna znachodzicca PVT. Śviedčańni dziaŭčyny ajcišnika zaličanyja nie byli, bo jana była ŭ navušnikach, tamu mahła nie čuć dakładna, što adbyvałasia.
Suprać Aleha vialisia dźvie administracyjnyja spravy — pa artykułach 23.34 i 23.4. Pa abodvuch pratakołach jon atrymaŭ pa 10 (270 rubloŭ) bazavych vieličyń.
«Kali b adrazu dali 15 sutak, to siońnia b jakraz vyjšaŭ na volu, a tak pašancavała navat», — sumna ŭśmichajecca spadar Aleh. Na praciahu kolkich hadoŭ Biełaruś sprabavała stać IT-stalicaj našaha rehijonu, ale takaja žorstkaść suprać ajcišnikaŭ, što vykazvajuć svaju niazhodu ź dziejańniami ŭładaŭ, baluča bje pa imidžy krainie ŭ śviecie.
