Fota Mikałaja Varabja
Lalak nazvany ptuškaj 2021 hoda ŭ Biełarusi, paviedamlaje greenbelarus.info. U finalnym hałasavańni jon abyšoŭ daŭhachvostuju sinicu. Ptuškaj 2020 hoda byŭ hłušec.
Lalak hniazdujecca na ziamli, aktyŭničaje nočču i ŭžo palacieŭ z krainy da krasavika. Jon dalataje da Paŭdniovaj Afryki!
Lalak pamieram z hołuba, ale z bolš doŭhimi kryłami i chvastom. Daŭžynia cieła da 29 sm, razmach kryłaŭ da 64 sm. Vaha nie pieravyšaje 100 h.
Lalak (lalak zvyčajny) — adziny pradstaŭnik atrada kazadojepadobnych u Biełarusi. A ŭsiaho ŭ śviecie naličvajecca kala 120 vidaŭ z hetaha atrada. Ruskaja nazva (kazadoj), jak i ŭ mnohich inšych jeŭrapiejskich movach, źjaŭlajecca kalkaj z łacinskaj. Jana adlustroŭvaje suviaź hetaha vidu z pašami i chatnimi žyviołami, vakoł jakich ptuški łavili nasiakomych.
Ubačyć lelaka ŭ dzikaj pryrodzie — vialikaja ŭdača, i nie tolki tamu, što jon aktyŭny tolki ŭ pryciemkach i nočču.
Hetaja ptuška — majstar maskiroŭki, jaho apiareńnie praktyčna źlivajecca z koleram lasnoj podściłki ci kary dreva. Pryžmuryŭšy svaje vialikija vočy, ptuška stanovicca dniom niezaŭvažnaj jak dla čałavieka, tak i dla ptušak-drapiežnikaŭ.
Fota Valeryja Dambroŭskaha
Lalak maje ŭnikalnuju dziubu. Zakrytym jon vyhladaje vielmi maleńkim. Ale varta ptušcy adkryć jaho, jak my ŭbačym niezvyčajna šyroki rot.
Lalak nie pierajmajecca nakont budaŭnictva hniazda. Kładku z dvuch jajek samka adkładaje prosta na lasnuju padściłku, čaściej za ŭsio ŭ sasnovym lesie. Ab prysutnaści ptuški možna daviedacca pa jaho praciahłamu manatonnamu poščaku, jaki nahadvaje tarachcieńnie matacykła.
