Alaksandar Łukašenka 10 kastryčnika naviedaŭ SIZA KDB, dzie sustreŭsia z palitviaźniami. Lilija Ŭłasava pobač ź Viktaram Babarykam.
Siabra prezydyjumu Kaardynacyjnaj rady Lilija Ŭłasava ŭ interviju rasiejskamu telekanału «Dožd́» raskazała pra padrabiaznaści sustrečy z Alaksandram Łukašenkam u SIZA KDB i pra ŭmovy źniavoleńnia.
Była damoŭlenaść pra kanfidencyjnaść razmovy, ale, pakolki inšyja ŭdzielniki pra jaje raskazvajuć u ŚMI, Ułasava vyrašyła taksama nie maŭčać. Svaboda padaje asnoŭnyja cytaty z razmovy:
Padumała, što heta dvajnik, a nie Łukašenka
Ja spačatku nie pavieryła, što heta Alaksandar Ryhoravič, što heta prezydent pryjšoŭ. Ja dumała, što heta dvajnik, rozyhryš. Praz 10 chvilin my ŭsie stali prychodzić u siabie i zrazumieli, što heta prezydent, asoby, jakija jaho supravadžajuć. Stała zrazumieła, što niešta adbyvajecca zvyšnaturalnaje.
Što havaryŭ pra Kanstytucyju
Alaksandar Ryhoravič zajaviŭ, što chacieŭ by abmierkavać novuju Kanstytucyju i chacieŭ pačuć našu dumku, ale nichto nia byŭ hatovy. Viktar Babaryka skazaŭ pra asnoŭnyja pałažeńni — pryvatnuju ŭłasnaść, padzieł uładaŭ. Alaksandar Ryhoravič staŭ kamentavać, vykazaŭsia suprać pryvatnaj ułasnaści. Z taho, što ja pamiataju, było skazana, što prezydencki termin budzie abmiežavany dvuma terminami, što jon na nastupnych vybarach udzielničać nia budzie, a ciapier jamu patrebny čas dla reformaŭ. Reformy buduć iści, Kanstytucyja budzie pryniataja, buduć novyja vybary. Hučaŭ termin praz dva hady, potym leta nastupnaha hodu, što tady budzie pryniataja Kanstytucyja i projduć vybary.
Łukašenka abiacaŭ praciahnuć «dyjaloh» u Pałacy Niezaležnaści
Łukašenka nie prajaŭlaŭ empatyi, ale i nie prajaŭlaŭ nehatyvu. Kazaŭ: «Ja baču, što vy lubicie Biełaruś hetak ža, jak i ja». Razmova skončyłasia tym, što jon skazaŭ, što nastupny raz ja vas zaprašu ŭ Pałac Niezaležnaści dla praciahu dyjalohu.
Nie davali pić i jeści
Z čatyroch z pałovaj hadzin 30—40 chvilin havaryli źniavolenyja, astatni čas — Alaksandar Ryhoravič. Ja ŭžo pry kancy razmovy amal traciła prytomnaść. Mianie pryvieźli ŭ KDB u 6:30 ranicy, ja nia vypiła ani hłytka vady, ničoha nia źjeła. A zaviaršyłasia heta ŭ 15:30. Maje kalehi taksama… Usie chacieli ŭ tualet. Vady nie było. Enerhietyka Alaksandra Ryhoraviča mocnaja takaja, — iranizuje Ułasava, — dla źniasilenych turemnym źniavoleńniem ludziej hety było mocnaje vyprabavańnie.
Pra ŭmovy vyzvaleńnia Babaryki
Ja spadziajusia, što ludziej pavinny vyzvalić. Ale ŭ mianie ŭražańnie, što nia ŭsich, napeŭna. Dla Viktara Babaryki byli ahučanyja kankretnyja ŭmovy vychadu. Ja, napeŭna, nia maju prava havaryć. Ja dumaju, što Maksima Znaka pavinny vypuścić najbližejšym časam, a Cichanoŭskaha, Kaleśnikavu i Babaryku — nie. Maksim Znak prajekt Kanstytucyi napisaŭ, svaje zaŭvahi.
Pra ciažkija ŭmovy źniavoleńnia
Za paŭtara miesiacy zdaroŭje sapsavałasia. Sprabuju adnavicca, pačała lačeńnie. Pakul hałaŭnyja boli nie prachodziać. Biełaruskaja turma — žorstkaje miesca. Apošnija try tydni siadzieła ŭ kamery, dzie 10 čałaviek. Nievialiki pakoj, u jakim usie kurać. Ja nie kuryła i ad hetaha vielmi pakutavała. Nievynosnyja ŭmovy isnavańnia. Psychalahična ciažka — žančyny płačuć, svaracca, časam bojki adbyvalisia. Važna ŭ takoj sytuacyi zachavać balans. Pakolki ja medyjatar i znajomaja z psychalohijaj, ja mahła sadziejničać ludziam, supakojvać ich.
Hora horkaje ŭ turmach. Terminy nie adekvatnyja dziejańniam. Ja ŭvohule nie razumieła, za što siadžu. Ja ničoha nie ździajśniała. Tvajo hora nakładajecca na inšyja, inšyja — na tvajo, i ty rastvarajeśsia ŭ hetym hory i nehatyvie. Adzinaja dumka — nia zdacca, trymacca. Navat kali cisk zaškalvaŭ, ja imknułasia zachavać zdarovy sens. U 67 hadoŭ ja pieražyła najmacniejšy stres.
