Situacyja z «Kamsamolskaj praŭdaj u Biełarusi» zastajecca krajnie składanaj. Paśla vybaraŭ Dom druku admoviŭsia drukavać hazietu, jakaja pisała praŭdu pra pratesty. «Biełdruk» pierastaŭ pradavać jaje ŭ svaich kijoskach, a «Biełpošta» anulavała padpiski.
Ciapier hazieta drukujecca ŭ Padmaskoŭi i pradajecca ŭ biełaruskich supiermarkietach i ŭ inšych pryvatnych raspaŭsiudnikaŭ. U vyniku nakład štodzionnaha numaru abrynuŭsia z 25-20 tysiač asobnikaŭ da 3000, nakład štotydniovaha — sa 150 tysiač da 30 tysiač.
Numar «Kamsamolskaj praŭdy ŭ Biełarusi», jaki nie trapiŭ u kijoski
U kancy žniŭnia kiraŭnictva kampanii «BiełKP-Pres», jakoje vydaje «Kamsamolskuju praŭdu ŭ Biełarusi» źmianiła hałoŭnaha redaktara. Hetu pasadu zaniała rasijanka Maryna Bunakova, byłaja redaktarka «Kamsamolskaj praŭdy» ŭ Chabaraŭsku.
«Heta była prapanova kirujučaj kampanii, pryniataja mnoj jak adzin z varyjantaŭ umacavańnia redakcyi i vyvadu z kryzisu pradpryjemstva» — patłumačyła tady hienieralnaja dyrektarka «BiełKP-Pres» Natalla Haleźnik.
Adnak ułady nie acanili krok nasustrač, hazietu pa-raniejšamu nie pradajuć u kijoskach. U suviazi z hetym, jak stała viadoma «Našaj Nivie», razhladajecca jašče adzin varyjant reformy.
Miarkujecca, što biełaruskuju redakcyju ŭznačalić 42-hadovy rasijski vajenny žurnalist Alaksandr Koc.
Alaksandr Koc
Koc udzielničaŭ u aśvietleńni kanfliktaŭ u Kosava, Afhanistanie, Siryi, Ukrainie i inšych krainach, apošnim časam znachodziŭsia ŭ Karabachu.
Za adnabakovaje infarmacyjnaje zabieśpiačeńnie anieksii Kryma i vajny na Danbasie jon uklučany ŭ śpis ukrainskaha «Miratvorca». Rasijskaje kiraŭnictva adździačyła jamu inačaj — miedalom «Za zasłuhi pierad Ajčynaj I i II stupieniaŭ».
Koc doŭhi čas pracavaŭ u tandemie ź inšym vajennym žurnalistam rasijskaj «Kamsamolskaj praŭdy» Dźmitryjem Ściešynym. Ściešyn viadomy tym, što ŭ maładości byŭ ultrapravym aktyvistam, byŭ u redakcyjnaj radzie časopisa «Ruski vobraz». Rasijskija ŚMI pisali, što ŭ jaho kvatery chavaŭsia lidar «Bajavoj arhanizacyi ruskich nacyjanalistaŭ» Mikita Cichanaŭ, jaki paśla byŭ prysudžany da pažyćciovaha źniavoleńnia za zabojstvy. Takoje ž pakarańnie atrymaŭ i hałoŭny redaktar «Ruskaha vobraza» Ihar Haračoŭ, kum Ściešyna.
Hałoŭnym redaktaram «Kamsamolskaj praŭdy ŭ Biełarusi» Alaksandr Koc stać nie moža — patrebnaje biełaruskaje hramadzianstva. Ale jak miarkujecca, moža zaniać niefarmalnuju kirujučuju pasadu.
«Heta adzin z varyjantaŭ. Pakul rana mierkavać, chto budzie dakładna, ale asoba Koca razhladajecca», — tak «Našaj Nivie» prakamientavała situacyju Natalla Haleźnik.
«Prabačcie, ja pakul nie kamientuju. Kali adpraviać, pahavorym», — adkazaŭ Alaksandr Koc na pytańnie karespandenta.
Tym časam niekalki rabotnikaŭ haziety — žurnalisty Evika Ota, Volha Ivašenka, a taksama namieśnica hałoŭnaha redaktara Ina Kačatkova — užo abvieścili pra svoj sychod.
