Fota Minsk-naviny
Bolš za 60 supracoŭnikaŭ Akademii mastactvaŭ, u tym liku prarektar pa vučebnaj rabocie Alena Bochan, zapatrabavali adnavić studentaŭ, adličanych z VNU. Pra heta havorycca ŭ ich adkrytym liście, jaki jość u rasparadžeńni Tut.by.
— My, vykładčyki i supracoŭniki Biełaruskaj dziaržaŭnaj akademii mastactvaŭ, zaklikajem spynić pieraśled studentaŭ i supracoŭnikaŭ, jakija vykazvajuć svaju hramadzianskuju pazicyju, adnavić adličanych studentaŭ, nie čynić pieraškod dla mirnych schodaŭ.
My vykazvajem svaju salidarnaść z tymi studentami, vykładčykami i supracoŭnikami Biełaruskaj dziaržaŭnaj akademii mastactvaŭ, čyje hramadzianskija i palityčnyja svabody byli parušany.
My nastojvajem na tym, što palityčny kryzis u biełaruskim hramadstvie moža być vyrašany tolki praz dyjałoh, u jakim voźmuć udzieł šyrokija koły biełaruskaha hramadstva. Hety dyjałoh niemahčymy, kali kiraŭnictvam našaj krainy vykarystoŭvajucca srodki hvałtoŭnaha pieraśledu hramadzian.
Zaraz jak nikoli my chočam, kab našyja hałasy byli pačutyja. Tamu ličym nieabchodnym adkryta vykazvać svajo mierkavańnie i padtrymlivać svaich studentaŭ. My majem na heta prava!
Siarod ludziej, jakija padpisali list — prarektar pa vučebnaj rabocie Akademii mastactvaŭ Alena Bochan, doktar mastactvaznaŭstva Volha Łabačeŭskaja, znakamity biełaruski hrafik Pavieł Tatarnikaŭ i inšyja.
Uviečary 27 kastryčnika ŭ telehram-kanałach źjavilisia fota zahadu ab adličeńni troch studentaŭ BDAI. Jak minimum adnaho ź ich - za ŭdzieł u akcyi. Jašče dvum — aficyjna zrabili vymovu. Dakumient ustupiŭ u siłu z 26 kastryčnika.
U tekście zahadu havorycca, što Sierafima Haničava (3-j kurs), Alaksandra Daniłkina (5-j kurs) i Karynu Čakur (5-j kurs) adličvajuć z 26.10.2020. Padstava — tłumačalnaja zapiska samoha studenta abo dakładnaja zapiska zahadčyka kafiedry žyvapisu Uładzimira Maśleńnikava, a taksama pratakoł pasiadžeńnia Savieta prafiłaktyki i praduchileńnia pravaparušeńniaŭ i pjanstva ad 26.10.2020 № 9.
Podpisy prarektara pa vučebnaj rabocie Aleny Bochan i dekana mastackaha fakulteta Hanny Konanavaj pad zahadam adsutničajuć.
