Lidary ES aficyjna pryznali surjoznaść druhoj chvali pandemii ŭ Jeŭropie i abviaścili pra niepaźbiežnaść novych i vielmi praciahłych sanitarnych mier, jakija spyniacca tolki paśla paśpiachovaj masavaj vakcynacyi, piša TASS.
Heta značyć, jany, imavierna, buduć zachoŭvacca ŭ toj ci inšaj formie na praciahu ŭsiaho 2021 hoda. Takija vyniki ekstrannaj videakanfierencyi lidaraŭ ES, pryśviečanaj baraćbie z pandemijaj, jakaja prajšła ŭ čaćvier viečaram.
Słova «karancin» nie hučała na vynikovaj pres-kanfierencyi samitu, adnak u realnaści bolšaść krain JEZ užo ŭviali roznyja formy častkovaha karancinu. Tak što, uličvajučy šmatlikija zakliki rychtavacca da doŭhich miesiacaŭ roznych abmiežavańniaŭ, možna zrabić adnaznačnuju vysnovu, što karancinnyja miery ŭ Jeŭropie zastanucca paŭsiudna i nadoŭha.
Samit ES paćvierdziŭ nieabchodnaść abmiežavańnia nieabaviazkovych pierasoŭvańniaŭ hramadzian jeŭrapiejskich krain, ale ŭ toj ža čas vystupiŭ za stvareńnie sistemy transhraničnaha pieramiaščeńnia ludziej i hruzaŭ ŭnutry supolnaści va ŭmovach pandemii. Heta značyć, havorka nie idzie pra zakryćcio ŭnutranych miežaŭ JEZ, ale ŭ masavym paradku svabodna jeździć pa Jeŭropie hramadzianam krain supolnaści nie dazvolać jašče doŭha.
Lidary Supolnaści pryznali nieabchodnaść uzhodnienych ahulnajeŭrapiejskich mier pa testavańni chvorych i raspracoŭcy dziejsnaj stratehii vakcynacyi z ulikam usioj nieabchodnaj łahistyčnaj padrychtoŭki, jakaja pavinna być zapuščana adrazu, jak tolki buduć hatovyja zachodnija vakcyny.
Ekstrannaja videakanfierencyja, u jakoj uziali ŭdzieł kala 30 kiraŭnikoŭ dziaržaŭ ES i instytutaŭ supolnaści, praciahvałasia amal 3 hadziny.
Pavodle źviestak Jeŭrakamisii, amal pa ŭsim Jeŭrasajuzie štodzionnaja kolkaść vyjaŭlenych chvorych u kancy kastryčnika ŭ niekalki razoŭ pieravyšaje pikavyja viasnovyja pakazčyki. U toj ža čas kolkaść śmierciaŭ ad zachvorvańniaŭ, źviazanych z karanavirusam, u siarednim zastajecca ŭdvaja mienšaj, čym viasnoj, adnak chutka raście razam z pavieličeńniem zachvorvańnia. Jeŭrapiejskija ekśpierty tłumačać nižejšuju śmiarotnaść druhoj chvali pandemii lepšaj padrychtoŭkaj siektara achovy zdaroŭja i adpracoŭkaj za minułyja miesiacy aptymalnych ałharytmaŭ simptamatyčnaha lačeńnia.
Lidary ES damovilisia vypracavać ahulnuju stratehiju vakcynacyi, uklučajučy raspracoŭku pryncypaŭ raźmierkavańnia vakcyn pamiž krainami supolnaści, vyznačeńnie ŭsioj łahistyki vakcynacyi (pieravozka, zachoŭvańnie vakcyn, zabieśpiačeńnie miedycynskich ustanoŭ nieabchodnym abstalavańniem i padrychtavanymi kadrami) i pryjarytetnych dla vakcynacyi sacyjalnych hrup, jak pa prafiesii i sacyjalnaj značnaści (naprykład, spačatku miedrabotniki i ŭradavyja čynoŭniki), tak i pa prynaležnaści da hrup ryzyki (naprykład, spačatku pažyłyja ludzi).
Lidary ES taksama pryniali rašeńnie paskoryć apracoŭku dadzienych kliničnych vyprabavańniaŭ zachodnich vakcyn ad karanavirusa, kab zabiaśpiečyć ich vyvad na rynki ŭ samyja karotkija terminy.
Kiraŭnik Jeŭrarady Šarl Mišel padkreśliŭ, što hetyja bazavyja miery pry ich niaŭchilnym vykanańni mohuć dazvolić zabiaśpiečyć baraćbu z pandemijaj biez poŭnaha spynieńnia jeŭrapiejskaj ekanomiki, jak heta było viasnoj.
Pavodle Jeŭrapiejskaha centra pa prafiłaktycy i kantroli zachvorvańniaŭ (ECDC), na hety momant amal usie krainy supolnaści ŭvajšli ŭ «čyrvonuju zonu» pa kolkaści zaražeńniaŭ, heta značyć hety pakazčyk značna pieravyšaje parohavuju dla ES adznaku 120 vypadkaŭ za apošnija dva tydni na 100 tysiač čałaviek.
Z pačatku pandemii karanavirusam u śviecie zarazilisia kala 44,5 młn čałaviek, bolš za 1,17 młn pamierli.
