42-hadovy mastak z Bresta Kirył Lašuk byŭ zatrymany ŭviečary 10 žniŭnia na centralnaj vulicy horada. Kali siłaviki schapili za ruku jahonuju žonku i jaje siastru, jon irvanuŭ da ich u abaronu. Ale troje siłavikoŭ adrazu załamali Kiryłu ruki za śpinaj i pakłali tvaram na plitku. Tak jon byŭ zatrymany. Na volu Kiryła vypuścili tolki praz čaćviora sutak sa štrafam i złamanaj nahoj. Žonka Kiryła Volha raspaviała pravaabaroncam, jak jaje muž sutyknuŭsia z žorstkaściu siłavikoŭ, pra toje, jak jana nie mahła znajści jaho paśla zatrymańnia, i jak prachodziŭ sud nad im.
Zatrymańnie Kiryła Lašuka trapiła ŭ kadr binkl.by.
«Kali b hety siłavik byŭ niemiascovy, jon by nie viedaŭ takich padrabiaznaściaŭ»
«Kiryła zatrymali ŭviečary 10 žniŭnia na Savieckaj vulicy na maich vačach. Jon ničoha takoha nie zrabiŭ, jon nikomu nie nahrubiŭ, jon pabieh u maju abaronu, kali mianie za ruku ŭziali supracoŭniki. Kiryła zaviali ŭ aŭtazak. Nam ź siastroj u hrubaj formie siłaviki, jakija «začyščali» vulicu, skazali sychodzić z Savieckaj. Ja prasiłasia da muža, tak jak jon apynuŭsia ŭ aŭtazaku z-za mianie. Ale supracoŭniki mnie adkazvali: «Dziaŭčyna, Vas tudy nie puściać, šukajcie jaho ŭ Leninskim RAUS, siońnia ŭsich buduć vieźci tudy». Kali ja spytała, dzie jano naohuł znachodzicca, mnie vyrazna adkazali: «U Paŭnočnym». Kali b hety siłavik byŭ niemiascovy, jon by nie viedaŭ takich padrabiaznaściaŭ. Ja miascovaja nie viedała, dzie znachodzicca hetaje RAUS.
«Bolš bydlačaha staŭleńnia, čym u Leninskim RAUS Bresta, ja nie bačyła»
Praz paŭhadziny my byli ŭžo tam. Kala RAUSa ŭžo było, takich jak ja, dziaŭčat piać. Adna pryniesła pieradaču mužu, jaki byŭ naziralnikam 9 žniŭnia na vybarach, a inšych zatrymali, hetak ža jak i Kiryła. Kala RAUS dziažuryŭ milicyjant u mascy. I jon nam usio kazaŭ: «Ja vam nastojliva rekamienduju sychodzić adsiul». Kali ja jamu skazała, što siudy pavinny pryvieźci majho muža i mnie treba daviedacca infarmacyju pra jaho, jon mnie adkazvaŭ, hledziačy ŭ vočy: «Ja vam ščyra kažu, što siońnia nichto nikoha siudy vieźci nie budzie. Ich paviazuć u Žabinku, Biarozu, ale tut nikoha nie budzie». Dziaŭčaty, jakija stajali sa mnoj, kazali jamu: «Piać chvilin tamu siudy zajazdžała chutkaja, aŭtazak». Milicyjant adkazvaŭ, što heta jany «tak pryjazdžali». Potym jon jašče havaryŭ nam razyścisia. Kali my ŭsie krychu adyšli, u dvor zajazdžali aŭtazaki i chutkaja».
Pa słovach žonki Kiryła, jana cełyja sutki nie mahli atrymać nijakaj infarmacyi pra svajho muža. Jak i inšyja bieraściejcy nie mahli daviedacca, dzie znachodziacca ich źnikłyja svajaki. Telefon u RAUS nie padymali, dźviery nie adčyniali, a ludziam, jakija pryjšli da RAUS, usio abiacali dać infarmacyju paźniej.
«Bolš bydlačaha staŭleńnia, čym u Leninskim RAUS Bresta, ja nie bačyła. Adna dziaŭčyna, jakaja taksama šukała svajho muža, pastukała ŭ bramu, na što joj z taho boku adkazali: «Chočaš siudy? Zaraz arhanizujem!» Na nastupny dzień, 11 žniŭnia, pryadčynilisia varoty i nam skazali, što śpisy zatrymanych buduć kala 14 hadzin.
U hety čas my pajechali ŭ prakuraturu, ale tam nam skazali, što jany nie zajmajucca pošukam ludziej. Ale, kali my tak chočam, to našy zajavy ab źniknieńniach ludziej paśla abiedu i narady, buduć pieradadzienyja ŭ Leninskaje RAUS.
Kali my viarnulisia ŭ RAUS, ja ŭbačyła proźvišča svajho muža ŭ śpisach zatrymanych. Ale nam skazali, što heta nie značyć, što zatrymanyja znachodziacca mienavita ŭ hetym RAUSie. Heta tolki paćviardžaje, što jon zatrymany. Ale dzie mienavita jon znachodzicca i pa jakim artykule zatrymany — było nieviadoma».
«32 čałavieki ŭ kamiery jeli hetyja piać marožanych»
Na druhija sutki zatrymańnia Kiryła jaho žoncy ŭdałosia daviedacca, što jon znachodzicca ŭ bresckim SIZA №7 i što jon zatrymany ŭ ramkach administracyjnaj spravy pa artykule 23.34 KoAP (udzieł u niesankcyjanavanym masavym mierapryjemstvie).
«Našy siabry pieradali jamu pieradaču: piečyva, šakaład, suchafrukty i piać pačkaŭ marožanaha. Jany padumali, što ŭ kamiery ža zvyčajna stolki ludziej źmiaščajecca. Ale potym akazałasia, što 32 čałavieki ŭ kamiery jeli hetyja piać marožanych. Muž raspaviadaŭ, što ŭ kamiery ŭsie adzin adnaho vielmi padtrymlivali. Adzin chłopiec navat paśla suda nie syšoŭ, zastaŭsia z usimi.
«Zanosili čałavieka, a ź jaho kroŭ kapała»
Usich zatrymanych 10 žniŭnia trymali adrazu ŭ haražach RAUSa, tamu što miescaŭ nie było. Jak raspaviadaje Kirył, vialikija haražy ŭžo byli vyzvalenyja dla ich. Na brudnaj ziemlanistaj padłozie jany lažali nie padymajučy hałavy. Tam było vielmi šmat ludziej. Zanosili čałavieka, a ź jaho kroŭ kapała. Jaho kinuli ŭ kut, jon byŭ uvieś u kryvi. Tak jany i nie daviedalisia, što z hetym čałaviekam było potym.
«Žyvioły chodziać pad siabie»
Potym Kiryła i ŭsich astatnich pieraviali ŭ spartyŭnuju zału. Amal sutki jany tam lažali. U ich była adna butelka vady na čałaviek sto zatrymanych. U tualet adrazu ich naohuł nie adpuskali. Kali ludzi prasilisia, to im kazali, što «žyvioły chodziać pad siabie». Ale potym, kali ŭ zale pajšoŭ pach, ich pačali vyvodzić pa adnym u tualet. Pa słovach Kiryła tam byli roznyja ludzi: i pažyłyja, i z epileptyčnymi prypadkami, i ciažarnaja žančyna.
«U kaho byli piarścionki na palcach — taho biŭ dubinkaj pa rukach»
Muž raspaviadaŭ, što ŭ hetym spartzale źbivali ŭsich žudasna. Niekatoryja siłaviki «adkazvali» za źbićcio pa peŭnych prykmietach. Naprykład, adzin źbivaŭ «žanacikaŭ» — u kaho byli piarścionki na palcach, taho biŭ dubinkaj pa rukach. Kala Kiryła lažaŭ małady chłopiec, jaki sprabavaŭ skazać, kab jaho nie bili, tamu što ŭ jaho tata milicyjant. Ale jaho źbivali ŭ niekalki razoŭ bolš, tamu što «tata drenna vychavaŭ».
U muža mocnych siniakoŭ nie było. Byli «kalidory» ź siłavikoŭ, kali ich pieravodzili z haraža ŭ spartzału. Voś tam Kirył atrymaŭ hiematomu na nazie».
Paśla vyzvaleńnia Kirył Lašuk źviarnuŭsia ŭ balnicu, dzie jamu dyjahnastavali pierałom pravaj stupni, paškodžańni levaha plača i pieradplečča, pravavoha ściahna. Niekatory čas jon prabyŭ u hipsie.
Miedycynskaja daviedka Kiryła Lašuka.
«Kali Kiryłu złamali nahu — jon dakładna nie viedaje. Jon kaža, što nie pamiataje, u jaki mienavita momant u jaho pačała baleć naha, ale heta było z samaha pačatku. Ci to jamu na jaje nastupili, ci to heta adbyłosia «u kalidory». Ale za čaćviora sutak jon źmiryŭsia z tym, što ŭ jaho balić naha.
Kali ich pieraviali ŭ SIZA, to ŭ kamiery siadzieli zvyčajnyja «zeki». I kali ŭ kamieru zaviali kala 30 čałaviek, tyja byli ŭ šoku. A kali jany pačali raspranacca paśla taho, što ź imi było, to «zeki» z nar padskočyli ad žachu. Jany vyzvalili im miesca i skazali, što za ŭsio svaju žyćcio takoha nie bačyli. Pamiž saboj razmaŭlali: «Chto ich tak i za što?»
«Vykrykvaŭ antyŭradavyja łozunhi»
Sudzili Kiryła Lašuka tolki na čaćviortyja sutki, 14 vieraśnia, u 18 viečara. Jaho spravu razhladaŭ sudździa suda Leninskaha rajona Bresta Andrej Hruško.
«Učastkovy śviedčyŭ na sudzie ab tym, što Kirył znachodziŭsia ŭ ludnym miescy na Savieckaj, simvoliki pry sabie nie mieŭ, ale vykrykvaŭ antyŭradavyja łozunhi. Sudździa pytaŭsia, čamu žyvučy ŭ inšym kancy horada, a ciešča, da jakoj my nakiroŭvalisia ŭ toj viečar, žyvie ŭ inšym kancy, jon apynuŭsia na Savieckaj vulicy. My adkazvali, što my byli ŭ CUMie. Sudździa nam kazaŭ: «Vy što, nie bačyli, što tam schod ludziej, što tam simvolika, čamu vy tam apynulisia?»
U vyniku sudździa aštrafavaŭ Kiryła na 10 bazavych vieličyniaŭ (270 rubloŭ), niahledziačy na toje, što jon užo adbyŭ čaćviora sutak. Navat nie troje! Abłasny sud pakinuŭ pastanovu bieź źmieny, niahledziačy na toje, što Kiryła ŭtrymlivali čaćviora sutak i złamali nahu».
Kirył Lašuk napisaŭ zajavu pa fakcie źbićcia jaho supracoŭnikami milicyi i nakont biesčałaviečnych umoŭ utrymańnia, ale pravierku pravodziać užo treci miesiac. Kiryła vyklikali na dopyt da troch roznych śledčych, bolš «zruchaŭ» pa hetaj spravie niama.
