Kala «Hrodna Azota». Fota Onliner.by.
Jak stała viadoma «Našaj Nivie», rabotnikam Homielskaha chimičnaha zavoda prapanoŭvajuć adpravicca ŭ kamandziroŭku ŭ Hrodna dla raboty na «Hrodna Azocie». Abiacajuć žyllo, termin kamandziroŭki — ad šaści miesiacaŭ.
Pra heta nam raskazali dva rabotniki homielskaha zavoda. Ludzi zrazumieli prapanovu tak, što imi chočuć zamianić bastujučych abo zvolnienych rabotnikaŭ «Azota».
Ahitujuć pierajechać hetak zvanych «aparatčykaŭ» — rabotnikaŭ cechaŭ, a taksama inžynierna-techničnyja kadry.
Kancern «Biełnaftachim» admaŭlaje zabastoŭku na «Azocie». U toj ža čas rabotniki pradpryjemstva havorać pra zabastoŭku bolš jak 100 klučavych supracoŭnikaŭ, u tym liku aparatčykaŭ, jakich niama kim zamianić.
Strajk pačaŭsia na zaklik Śviatłany Cichanoŭskaj. Patrabavańniaŭ try: adstaŭka Alaksandra Łukašenki, vyzvaleńnie palitviaźniaŭ i svabodnyja vybary.
Zabastoŭku padtrymali sotni małych i siarednich pradpryjemstvaŭ, pieravažna IT-siektara i śfiery pasłuh, studenty roznych VNU, a taksama asobnyja rabotniki niekatorych dziaržaŭnych zavodaŭ, u tym liku METZ i «Hrodna Azota».
Pra «Hrodna Azot», horadaŭtvaralnaje pradpryjemstva, kažuć, što jon moža adyhrać u losie Biełarusi tuju ž rolu, jakuju ŭ losie Uschodniaj Jeŭropy 1980-ch adyhrała Hdańskaja sudnavierf.