Fota z fejsbuka
25-hadovaja bieraściejka Maryna Hłazava druhi miesiac znachodzicca ŭ SIZA pa «spravie ab karahodach» na skryžavańni bulvara Kasmanaŭtaŭ i praśpiekta Mašerava ŭ Breście 13 vieraśnia. Biełaruskija pravaabaroncy pryznali jaje palitviaźniem, piša «Bresckaja hazieta».
Dniom 13 vieraśnia ŭ Breście prachodziła maštabnaja akcyja pratestu, jakaja skončyłasia karahodami na skryžavańni bulvara Kasmanaŭtaŭ i praśpiekta Mašerava i nastupnym razhonam pratestoŭcaŭ vadamiotam. Praz dva dni SK raspačaŭ kryminalnuju spravu ab masavych biesparadkach, a ranicaj była zatrymanaja 25-hadovaja Maryna Hłazava — nastaŭnica polskaj i anhlijskaj moŭ.
SK
Jana — adzinaja padazravanaja pa hetaj spravie dziaŭčyna, jakaja ciapier u SIZA. Pa słovach baćki dziaŭčyny, paeta Uładzimira Hłazava, pieršy čas u rodnych, siabroŭ Maryny byŭ šok z-za hetaj situacyi: «Adnak z časam źmirylisia. Bo čałaviek pryvykaje da ŭsiaho».
Fota z asabistaha archivu
Samym ciažkim dla dziaŭčyny, miarkujučy pa jaje listach, byŭ čas, kali jaje pieravodzili z adnoj kamiery ŭ inšuju. Davodziłasia pastajanna pryvykać da novych ludziej. Akramia taho, pieršyja dni joj niezdaroviłasia, treba było pieradavać miedykamienty.
Kantakty z dačkoj u baćki — praź listy. Ranicaj 27 kastryčnika Uładzimir atrymaŭ čarhovy.
«Dačka napisała, što novaja kampanija — dobraja i viasiołaja. Z usimi pasiabravali. Usie dzielacca adna z adnoj pieradačami», — raspaviadaje baćka Maryny.
Ranicaj 27 kastryčnika abarona Maryny Hłazavaj abskardziła ŭ abłasnym sudzie ŭtrymańnie dziaŭčyny pad vartaj. Pasiadžeńnie było zakrytym. Skarhu pakinuli biez zadavalnieńnia. Maryna zastajecca ŭ SIZA.
Vy možacie padtrymać Marynu Hłazavu i napisać joj list pa adrasie: SIZA-7, h. Brest, vuł. Savieckich pamiežnikaŭ, 37, 224030.
