Na sustrečy Alaksandra Łukašenki ź Siarhiejem Naryškinym prysutničali kiraŭniki Rady biaśpieki Valeryj Vakulčyk i Kamiteta dziaržaŭnaj biaśpieki Ivan Cierciel. Fota BiełTA.
«Maskva pačynaje dystancyjavacca ad taho, što moža adbycca ŭ Minsku 25—26 kastryčnika i paśla hetych dat», — miarkuje były biełaruski dypłamat, pamočnik Alaksandra Łukašenki pa mižnarodnych pytańniach Ihar Laščenia.
U toj ža čas Maskva pakul nie bačyć u Biełarusi fihury, jakaja mahła b harantavać rasijskija intaresy hetak ža, jak Alaksandr Łukašenka, ličyć Laščenia.
25 kastryčnika skončycca termin ultymatumu Śviatłany Cichanoŭskaj, paśla čaho apazicyja źbirajecca pierajści da bolš aktyŭnych dziejańniaŭ.
Laščenia źviartaje ŭvahu na adkaz ministra zamiežnych spraŭ Rasii Siarhieja Łaŭrova na pytańnie ab hatoŭnaści da źmieny ŭłady ŭ Biełarusi (14 kastryčnika): «Nieabchodna bačyć pierśpiektyvu raźvićcia našych sajuźnikaŭ, tyja kroki, jakija nam dazvolać zachavać dobryja, uzajemavyhadnyja adnosiny ź imi, niezaležna ad taho, jak buduć raźvivacca ŭnutrypalityčnyja padziei».
«A voś 22 kastryčnika aficyjny Minsk moh pachvalicca adrazu patrojnaj uvahaj Maskvy. «Rucinny» vizit dyrektara słužby zamiežnaj vyviedki S. Naryškina prachodziŭ u abramleńni vykazvańniaŭ U. Pucina i D. Piaskova na biełaruskuju tematyku», — piša Ihar Laščenia siabie ŭ fejsbuku.
Na pasiadžeńni dyskusijnaha kłuba «Vałdaj» Uładzimir Pucin dapuściŭ, što biełaruskimi siłavikami ŭžyvałasia nieapraŭdanaja žorstkaść. I vykazaŭ mierkavańnie, što, tyja, chto heta dapuściŭ, pavinny adkazać.
A jaho pres-sakratar u intervju prahramie «Vialikaja hulnia» i zusim zaviaršyŭ apisańnie hłybini rasijska-biełaruskich adnosin vysnovaj ab tym, što «dla Pucina i dla Rasii hałoŭnaje — heta nie adnosiny dvuch prezidentaŭ, nie adnosiny asabista z Łukašenkam. Hałoŭnaje — heta adnosiny z bratnim dla nas biełaruskim narodam», — źviartaje ŭvahu Laščenia.
Toje, što palityki nie mohuć publična skazać sami, jany daručyli televiadučaj NTV Iradzie Ziejnałavaj, jakaja 18 kastryčnika zajaviła: «Łukašenka pavinien zrazumieć, što nastupny tranš, jaki sydzie taksama na apłatu daŭhoŭ, budzie vielmi mocna zaležać ad taho, jak jon svaje abiacańni vykanaje: i pa tranzicie naftapraduktaŭ praz našy party, i pa refierendumie pa Kanstytucyi, paśla jakoha pavinny prajści vybary».
U toj ža čas, miarkuje Laščenia, Kreml nie admoviŭsia ad pryznańnia Alaksandra Łukašenki pieramožcam prezidenckich vybaraŭ, tamu što Maskva «pakul nie bačyć realnaha alternatyŭnaha kandydata, jaki moh chacia b zbolšaha zachavać ciapierašni ŭzrovień rasijskich intaresaŭ u našaj krainie».
