U subotu siłaviki zabrali traich z našych šerahaŭ. Spačatku — «dla pravierki dakumientaŭ», jakaja ŭ Biełarusi moža ciahnucca nieviadoma kolki. Ale chutka vyśvietliłasia, što ŭsio jašče horaj: suprać ich pačali «administracyjny praces», minimum da paniadziełka jany buduć siadzieć u čakańni suda na Akreścina. Chto jany — ludzi, jakija robiać karcinku i zdabyvajuć infarmacyju ŭ niemahčymych umovach?
Vadzim Zamiroŭski, fatohraf Tut.by i BiełaPAN
Vadzim Zamiroŭski. Fota Siarhieja Bałaja
Vadzim Zamiroŭski — adzin z najviadomiejšych i najpaśpiachoviejšych fatohrafaŭ Biełarusi, choć sam maje armianskija karani. U Minsk Vadzim pryjechaŭ u 1991 hodzie, z taho času tut i žyvie. Z žonkaj Marynaj haduje syna Jana, jakomu niama jašče i hodzika.
Pakul tata na Akreścina, Maryna vymušana spraŭlacca sama: «Vadzik, my čakajem ciabie. Dziakuj za praŭdu! Ty nie baišsia, ty idzieš i robiš svaju rabotu. Ty naš hieroj!»
Vadzim z Marynaj i Janam. Fota ź siamiejnaha archivu.
Vadzim viadomy ŭ Biełarusi najpierš jak fatohraf najpapularniejšaha biełaruskaha partała Tut.by, dla jakoha jon zdymaje apošnija siem hadoŭ. Zamiroŭskaha z kamieraj možna ŭbačyć paŭsiul, dzie adbyvajecca štości važnaje. Ale chiba najbolš jaho chvalujuć čałaviečyja prablemy ŭ kropkach kanfliktaŭ. Ludski bol nie daje jamu spakoju. Jon i na Danbas u 2017-m pajechaŭ, kab zafiksavać, jak pracujuć miedyki na froncie, «Naša Niva» drukavała hety śpiecrepartaž.
Vadzim — adzin ź niamnohich fatohrafaŭ, jakoha minčuki paznajuć na vulicach, da jakoha padychodziać i dziakujuć za pracu. Ale sam Vadzim nadzvyčaj ścipły čałaviek, jon nie imkniecca da niejkich samaśćviardžeńniaŭ, aproč jak kudyści pajechać i zrabić fotarepartaž.
Zdymki Vadzima raźlatajucca pa ŭsim śviecie. Adzin z apošnich kadraŭ, jaki ablacieŭ płanietu, — ź minskaha pratestu. Dziaŭčyna siadzić na ziamli pierad siłavikami, u vačach — adčaj. Fota ŭvajšło ŭ top-20 najlepšych zdymkaŭ tydnia The Guardian. I takich kadraŭ u Vadzima šmat.
Fota Vadzima Zamiroŭskaha, TUT.BY
Kab nie Vadzim, moža, nie było b i najprestyžniejšaha konkursu dla biełaruskich fatohrafaŭ «Pres-fota Biełarusi». Vadzim šmat hadoŭ byŭ ščyra addany hetamu prajektu.
Usievaład Zarubin, videaapieratar Tut.by i BiełaPAN
Videaapieratar Usievaład Zarubin naradziŭsia ŭ Hiermanii, a paśla z baćkami viarnuŭsia ŭ Biełaruś i pravioŭ dziacinstva ŭ Breście. Vučyŭsia ŭ Akademii mastactvaŭ. Chłopiec lubić usio, što źviazana z technikaj, i asvojvaje ŭsie navinki, jakija tolki źjaŭlajucca. Jon, darečy, adnym ź pieršych nabyŭ 3D-pryntar.
Fota z Facebook
U kamandzie Tut.by Usievaład z 2017 hoda. U videaadziele jaho nazyvajuć techničnym huru. Chłopiec lubić aktyŭny rytm žyćcia i kajfuje ad svajoj pracy. Jeździŭ u kamandziroŭki nie tolki pa Biełarusi, ale i ŭ Hruziju, Ukrainu.
Doma jaho zaraz čakajuć žonka Hanna i dačka-školnica Varvara.
Darja Śpievak, reparciorka Onliner.by
Darja Śpievak — žurnalistka «Anłajniera». Sama jana sa Śvietłahorska. Try hady tamu skončyła Instytut žurnalistyki BDU, pracavała ŭ «Źviaździe».
Vučyłasia taksama na roznych kursach dla žurnalistaŭ, jeździła na stažyroŭku ŭ Vialikabrytaniju. Dla «Anłajniera» jana rychtavała sieryju dušeŭnych siužetaŭ pra doŭhažycharoŭ u hłuchich vioskach, repartaž z čarnobylskaj zony.
Fota z Instagram
U volny čas Darja padarožničaje pa zakutkach Biełarusi i čytaje Karatkieviča z Baradulinym. Horača lubić svajho kata. Heta śmiełaja dziaŭčyna z vostrym pačućciom humaru.
U minułyja vychodnyja žurnalistku zatrymali padčas pracy ŭ Hrodnie, ale praź niekalki hadzin adpuścili. Na hety raz siłaviki załomlivali joj ruki, kali viali da mašyny.
