Dziejańnie licenzii advakata Viktara Babaryki i Maryi Kaleśnikavaj Alaksandra Pylčanki spynienaje z 16 kastryčnika, paviedamiŭ Pylčanka Tut.by.
Nahadajem, 15 kastryčnika kvalifikacyjnaja kamisija pa pytańniach advakackaj dziejnaści pry Ministerstvie justycyi na pasiadžeńni rekamiendavała pazbavić licenzii Alaksandra Pylčanku.
Licenzija advakata dziejničała da atrymańnia Pylčankam piśmovaha rašeńnia Miniusta. Jaho Pylčanka atrymaŭ, u rašeńni paznačana, što licenzija pierastaje dziejničać ad 16 kastryčnika.
Sutnaść pretenzij da advakata — u jaho kamientary Tut.by. U publikacyi ad 14 žniŭnia Alaksandr Pylčanka raspavioŭ, jakija paŭnamoctvy maje hienprakuror i jakija dziejańni moža raspačać pa apublikavanych u ŚMI videa i śviedčańniach źbićcia ludziej 9-12 žniŭnia ŭ RUUS i IČU. Juryst zajaviŭ, što hienieralny prakuror Biełarusi pavinien raspačać kryminalnyja spravy pa faktach źbićcia mirnych hramadzian, žorstkaha i biesčałaviečnaha abychodžańnia z zatrymanymi. Juryst taksama adznačyŭ, što Hienprakuratura pavinna adchilić ad zajmanych pasad na čas pravierki ministra ŭnutranych spraŭ, jaho namieśnikaŭ i načalnika IČU da vyśviatleńnia ich dačynieńnia abo niedatyčnaści da taho, što adbyłosia.
Pavodle zajavy Miniusta, Alaksandr Pylčanka «dapuściŭ u ŚMI niekampietentnyja kamientary i faktyčna zaklikaŭ da supraćpraŭnych dziejańniaŭ, u tym liku da «błakavańnia i razzbrajeńnia voinskich padraździaleńniaŭ».
