Najmienšuju ryzyku zaražeńnia karanavirusam majuć ludzi z hrupaj kryvi AB0 (pieršaja hrupa), ad hetaha ž zaležyć ciažkaść formy chvaroby, havorycca ŭ vynikach dvuch daśledavańniaŭ, apublikavanych u časopisie Blood Advances, piša partał MedicalXpress.
Dackija śpiecyjalisty paraŭnali źviestki zvyš 473 000 čałaviek, pratestavanych na COViD-19. Siarod tych, chto mieŭ stanoŭčy vynik, akazałasia najmienš pacyjentaŭ z hrupaj kryvi AB0 (pieršaja hrupa) i bolš z A (druhaja), B (treciaja) i AB (čaćviortaja). Navukoŭcy tłumačać heta tym, što pieršaja hrupa kryvi nie ŭtrymlivaje antyhienaŭ erytracytaŭ, jakija prapuskajuć virus u arhanizm.
Inšaje daśledavańnie achapiła 95 ciažkachvorych pacyjentaŭ, špitalizavanych u Kanadzie. Najaŭnaść hrupy kryvi A ci AV padvyšała vierahodnaść uskładnieńniaŭ, jakija patrabujuć intensiŭnaj terapii i štučnaj vientylacyi lohkich.
Raniej daśledčyki z Kitaja, ZŠA i Irana pryjšli da vysnovy, što ludzi z druhoj hrupaj kryvi čaściej za inšych pamirajuć ad vyklikanych karanavirusam uskładnieńniaŭ. Krychu radziej pamirali pacyjenty z treciaj i čaćviortaj hrupami, a najmienš uraźlivymi da COVID-19 navukoŭcy nazvali ludziej ź pieršaj hrupaj kryvi.
