Nahadajem, što nie tak daŭno stała viadoma, što lepšuju spartsmienku minułaha hoda, čempijonku śvietu pa frystajle Alaksandru Ramanoŭskuju zvolnili z nacyjanalnaj kamandy «za prahuły», chacia ŭ jaje była fors-mažornaja situacyja: baćka spartsmienki pieranios insult, nie było kamu vazić jaho ŭ balnicu, hetym zajmałasia Alaksandra.
U Respublikanskim centry alimpijskaj padrychtoŭki na heta nie źviarnuli ŭvahi, chacia ŭsim było zrazumieła, što nasamreč Ramanoŭskuju zvolnili za jaje aktyŭnuju hramadzianskuju pazicyju.
Zahad ustupić u siłu 16 kastryčnika, ale rašeńnie RCAP budzie asprečvacca.
Akramia taho, raniej i hałoŭnaha treniera zbornaj Biełarusi Mikałaja Kazieku pazbavili prezidenckaj stypiendyi. Jon taksama asudziŭ hvałt na vulicach Biełarusi paśla vybaraŭ.
— Na hetym tydni Sašy zrabili apieracyju, — raspavioŭ «Narodnaj Voli» Mikałaj Kazieka. — Daktary, jakija jaje pravodzili, kažuć, što ŭsio prajšło paśpiachova. Heta była takaja kaśmietyčnaja apieracyja, byŭ rubiec na kalennym sustavie, i jaho, tak by mović, nivieliravali.
— Kolki času praciahniecca reabilitacyja?
— Pakul ničoha nie viadoma, miedyki buduć adšturchoŭvacca ad taho, jak pojdzie praces adnaŭleńnia.
— Uličvajučy, što Sašu zvolnili, jakija jaje dalejšyja spartyŭnyja pierśpiektyvy?
— Pakul jana znachodzicca na balničnym, a dalej pabačym, što budzie. Chaciełasia b vieryć u lepšaje.
— Vas pazbavili prezidenckaj stypiendyi, i hrošy za peŭny pieryjad vy pavinny viarnuć dziaržavie. Jakaja heta suma?
— Dakładna nie viedaju, bo pakul hety praces idzie, i nie chočacca biehčy napieradzie ciahnika.
— Jak ciapier pracujecca ŭ śviecie apošnich padziej?
— Pracujem u štatnym režymie, ciapier krychu situacyja supakoiłasia.
— Viedaju, što na hetym tydni da vas pryjazdžaŭ i alimpijski čempijon Anton Kušnir, jaki zaraz pracuje trenieram sa zbornaj Kazachstana. Vučań vyrašyŭ padtrymać nastaŭnika?
— Anton ciapier nasamreč u Minsku. Tut i pandemija paŭpłyvała, i apieracyju treba było rabić z-za starych traŭm. A zachodziŭ da mianie ŭ hości akurat paśla svajho dnia naradžeńnia. Prynios sok, tort, sušy, dušeŭna pasiadzieli. Nam było pra što pahavaryć…