Fota Siarhieja Hudzilina
Eks-kiraŭnik Abjadnanaj hramadzianskaj partyi adbyvaje administracyjny aryšt u Baranavičach. Učora žonka adviezła jamu pieradaču, piša «Narodnaja vola».
Nahadajem, što Anatola Labiedźku sudzili za ŭdzieł u niesankcyjanavanaj akcyi, jaho zatrymali 8 kastryčnika, jon atrymaŭ 15 sutak. Paśla rašeńnia suda palityk u znak pratestu abviaściŭ haładoŭku.
— Śviatłana, raskažycie, jakija apošnija naviny ad vašaha muža? Jak samaadčuvańnie? Jon praciahvaje haładać?
— Ź im u sieradu sustrakaŭsia advakat. Dziakuj Bohu, z haładoŭki jon vyjšaŭ. Nam udałosia pierakanać jaho, što zdaroŭje daražejšaje. Ja muža nie bačyła, ale, sa słoŭ advakata, jon trymajecca badziora. Schudnieŭ, praŭda. Ale ja vielmi zadavolenaja, što jon vyjšaŭ z haładoŭki…
— Kolki dzion jon haładaŭ?
— Ź minułaha čaćviarha, 4-5 dzion, ale dakładna skazać nie mahu.
Siońnia [u čaćvier] ja jeździła pieradać jamu pieradaču. Ludziej kala izalatara vielmi šmat, pryčym vielmi šmat mašyn ź minskimi numarami. Pieradačy pačynajuć prymać ź dziaviataj ranicy, ja pryjechała kala 9.30 i ŭžo była sorak niejkaja ŭ čarzie. A kali źjazdžała, tam było pad dzievianosta čałaviek! Ci paśpiejuć usie ludzi zdać svaje pieradačy svajakam — vialikaje pytańnie.
Vielmi chaču spadziavacca, što Anatola adpuściać 23 kastryčnika. Našaj unučcy 25 kastryčnika dva hady, chaciełasia b, kab u hety dzień jon byŭ z nami.
— Moža, viedajecie, jakija ŭmovy, kolki čałaviek razam ź im u kamiery?
— Kamiera na 10 čałaviek, na ŭčarašni dzień tam było dzieviać aryštantaŭ. Pa słovach advakata, chaładnavata, ale miesca spalnaje ŭ muža jość, navat bializnu niejkuju vydali! Ježa — turemnaja, sami razumiejecie. I toje, što ja siońnia sieje-što pieradała — mabyć, u ich budzie śviatočnaja viačera. A jašče skazali, što i pamyjucca ŭ dušy!
— Pieradaču pryniali biez pytańniaŭ?
— Pierahledzieli i razharnuli absalutna ŭsio! Navat ručnik pryjšłosia razarvać na dźvie častki — skazali, što zanadta vialikaje, a im tam ručniki nibyta naohuł nie patrebnyja.
— Śviatłana, spačatku Anatol byŭ u SIZA na Akreścina…
— Adrazu — tak, a potym pieraviali ŭ Baranavičy — tam šmat mienčukoŭ, u tym liku i tyja, kaho zatrymali na niadzielnaj akcyi pratestu. Ja tak razumieju, poŭny izalatar…
