Prafiesary ź Instytuta słavistyki Polskaj akademii navuk dy Varšaŭskaha ŭniviersiteta (siarod jakich Elžbieta Smułkova — znakamitaja daśledčyca-dyjalektołah dyj jašče i były pasoł Polščy ŭ Biełarusi) paśla taho, jak pračytali skandalny artykuł Husakova i Kavaleni pra dvuchmoŭje, nakiravali im list. Jaho cytuje philology.by.
«Jak słavisty, jakija šmat hadoŭ zajmajucca dvuchmoŭjem i Biełaruśsiu, my rašuča pratestujem suprać publikacyj ideałahičnaha źmiestu pad vyhladam navukovych artykułaŭ. Tekst «Biełorussko-russkoje dvujazyčije — istoričieski słoživšajasia duchovno-kulturnaja ciennosť naroda» U. R. Husakova i A. A. Kavaleni nie adpaviadaje nivodnamu z kryteryjaŭ navukovaha tekstu, siarod jakich možna nazvać: abjektyŭnaść daśledavańnia, ukazańnie na navukovy mietad, jaki vykarystoŭvajecca ŭ daśledavańniach, a taksama biblijahrafija ŭ halinie sučasnych vysokaraźvitych hłabalnych daśledavańniaŭ bilinhvizmu.
Pakolki heta nie navukovy tekst, jon nie zasłuhoŭvaje navukovaj palemiki. Mienavita tamu naša reakcyja — pratest.
Artykuł spadaroŭ prafiesaraŭ, jaki pradstaŭlaje nacyjanalistyčnuju apałohiju ruskaj movy, nie maje ničoha supolnaha z navukovym pohladam na biełaruska-ruskaje dvuchmoŭje.
Jon źmiaščaje šmatlikija histaryčnyja skažeńni i manipulacyi, falsifikuje historyju biełaruska-rasijskich adnosin, zamoŭčvajučy surovuju antybiełaruskuju palityku rasijskaha impieryjalizmu jak minimum z XVIII stahodździa.
Pradstaŭleny ŭ tekście nacyjanalistyčny stereatyp ruskaj movy abražaje fundamientalnyja linhvistyčnyja viedy, a ahulnyja źviestki pra biełaruska-ruskaje dvuchmoŭje zasłaniajuć asnoŭny faktar hetaha dvuchmoŭja — palityčny pryvilej ruskaj movy za košt biełaruskaj.
Ruskaja mova nie maje patreby ni ŭ abaronie, ni ŭ rekłamie. Joj karystajucca bolš za 258 miljonaŭ čałaviek pa ŭsim śviecie. Heta adna z moŭ kanhresa, tady jak biełaruskaja mova ŭvachodzić u hrupu moŭ, što vyciskajucca.
Pradstaŭleńnie supiarečlivych faktaŭ, vidavočnych kožnamu movaznaŭcu i słavistu, kampramietuje členaŭ Nacyjanalnaj akademii navuk Biełarusi. Absalutna niedastojnaj hodnaści navukoŭcaŭ zjaŭlajecca naśmiešlivaja krytyka inšych moŭ — anhlijskaj, italjanskaj, niamieckaj, francuzskaj i polskaj.
U toj čas, kali biełarusy, u poŭnaj hodnaści i mudraści, mirna zmahajucca za svaje čałaviečyja pravy i pieramohu praŭdy, spraviadlivaści i sumlennaści na svajoj radzimie, vyklikajučy najvyšejšaje pryznańnie i pašanu va ŭsim śviecie, takija prapahandysckija teksty, jak tekst spadaroŭ prafiesaraŭ, vyklikajuć nie tolki mierytaryčny pratest, ale i maralnaje asudžeńnie».
List padpisali daktary navuk Elžbieta Smułkova (Varšaŭski ŭniviersitet), Anna Zialenska (Instytut słavistyki Polskaj Akademii navuk), Anna Enhielkinh (Instytut słavistyki PAN), Jeva Hałachoŭska (Instytut słavistyki PAN), Jadźviha Linde-Usiaknievič (Varšaŭski ŭniviersitet).
