Pratest u Minsku. Fota Nadziei Bužan
1) Adbyłasia nie sieparatnaja sustreča Łukašenki z kimści asobnym z palityčnych viaźniaŭ ci kiraŭnikoŭ apazicyi, a sustreča z cełaj hrupaj ich, chaj sabie i niapoŭnaj bieź Cichanoŭskaha, Kaleśnikavaj, Statkieviča, Sieviarynca, Łatuški i Aleksijevič. I, kaniečnie, Śviatłany Cichanoŭskaj, jakaja volaju losu stała nacyjanalnym lidaram biełarusaŭ i pavinna być u centry luboha pieramoŭnaha pracesu.
2) Sustreča była nie rytualnaj, doŭžyłasia 4,5 hadziny.
3) Łukašenka sustrakaŭsia nie z tymi, chto zastajecca na svabodzie ci vyjechaŭ u emihracyju, a z tymi, chto pieranios presinh źniavoleńnia, mahčyma, u spadziavańni, što hetyja ludzi bolš schilnyja da dyjałohu na ŭmovach uładaŭ.
4) Pra sustreču paviedamili, chaj i kurtata, dziaržaŭnyja ŚMI, pryčym nazvali jaje sustrečaj sa źniavolenymi členami «Kaardynacyjnaj rady». Značyć, heta nie sustreča «dla ŭžytku prychilnikaŭ apazicyi», heta častka šyrejšaha paradku.
5) My nie viedajem pakul detalaŭ sustrečy, my nie viedajem, ci byŭ dadatkovy cisk na jaje ŭdzielnikaŭ-palitviaźniaŭ i jaki. Prynamsi adzin ź ich, Juryj Vaskrasienski, niadaŭna fihuravaŭ u prapahandysckich prahramach BT, dzie vyhladaŭ złomlenym i manipulavanym.
6) Tym nie mienš, sam fakt hetaj sustrečy — pryznańnie statusu palitviaźniaŭ, u tym liku Babaryki, Znaka i Ułasavaj, pryznańnie, što jany — palityčnyja, a nie padazravanyja ŭ ekanamičnych złačynstvach. Heta hihanckaja pieramiena.
7) Choć sustreča adbyłasia ŭ SIZA KDB, heta pryznańnie taho, što druhi bok u biełaruskaj palitycy lehitymny. Sustreča — pryznańnie lehitymnaści pratestoŭcaŭ, apazicyi i ich lidaraŭ.
8) Zapomnicie hety dzień — 10 kastryčnika. Jon taki ž važny, jak dzień 9 žniŭnia, bo tady adbylisia vybary, što pieraviarnuli situacyju ŭ krainie i źmianili ŭjaŭleńni bolšaści hramadzian pra jaje. I taki ž važny, jak dzień 12 žniŭnia, bo tady stała jasna, što pratesty — heta ŭsurjoz i nadoŭha, a inicyjatyva — u rukach pratestoŭcaŭ. Spatrebiłasia jašče dva miesiacy štodzionnych vystupaŭ, u jakich brali ŭdzieł praktyčna ŭsie słai biełaruskaha hramadstva, akramia siłavikoŭ. Pamiž 12 žniŭnia i 10 kastryčnika, a taksama pierad 9 žniŭnia, byli 13 580 zatrymanych, 300 kryminalnych spraŭ i 4 demanstranty, što addali svajo žyćcio dziela svabody i niezaležnaści.
9) Takaja sustreča moža stać pieršym krokam u kirunku Kruhłaha stała — najlepšaha sposabu mirnaj transfarmacyi, jaki isnuje. Mienavita ŭ hetym značeńnie siońniašniaha dnia. Ale napieradzie jašče doŭhaja daroha.
