Paśla niadzielnaha maršu ŭ Minsku 4 kastryčnika była zatrymanaja i adpraŭlenaja ŭ Centr izalacyi pravaparušalnikaŭ na Akreścina ŭnikalny doktar Inesa Daronina —zahadčyca adździaleńnia transfuzijałohii i ekstrakarparalnych mietadaŭ lačeńnia RNPC dziciačaj ankałohii, hiematałohii i imunałohii.
U hetym adździaleńni ŭsiaho adzin doktar — i heta Daronina, astatnija ŭsie miedsiostry. Daroninu časova zamianiaje reanimatołah Alaksiej Kakunin.
Kalektyvu ab zatrymańni siońnia na piacichvilincy paviedamiła kiraŭnictva.
5 kastryčnika jaje musili sudzić u Pieršamajskim sudzie Minska. U paniadziełak kalehi nie zmahli daviedacca, čym skončyŭsia sud. U aŭtorak stała viadoma, što joj dali 25 bazavych (675 rubloŭ).
Sudździa pa jaje administratyŭnaj spravie — Maksim Trusievič. Toj samy, što daŭ 10 sutak aryštu televiadučamu Dźmitryju Kachno.
Na 5 kastryčnika ŭ jaho było zapłanavana bolš za 10 pracesaŭ. Vałanciory paśpieli adsačyć pałovu ź ich — usim zatrymanym Trusievič davaŭ sutki.
Inesa Daronina
«Inesa — vybitny śpiecyjalist, jaje rabota technična składanaja», — dajuć joj charaktarystyku kalehi.
«Naprykład, jana adzinaja robić zabor hranułacytaŭ i trambacytaŭ dla pieralivańniaŭ, zabor pieryfieryjnych stvałavych kletak: dzicia padklučajuć da śpiecyjalnaha aparata, praź jaki prachodzić jaho kroŭ, aparat łović «śpiecyjalnyja» kletki», potym jany admysłova rychtujucca i paśla vysokadoznaj chimijaterapii pieralivajucca dzicionku nazad.
Tak lečać, naprykład, pacyjentaŭ ź niejrabłastomaj i rabdoidnymi puchlinami.
U jaje adździaleńni dzieci nie lažać, ale jany tudy prychodziać na lačeńnie.
Taksama jana robić fotafarezy, heta mietad lačeńnia pacyjentaŭ paśla transpłantacyj z uskładnieńniami, kali arhanizm nie prymaje transpłantant.
Heta śpiecyfičnaja rabota, prosta stać za aparat i rabić nie atrymajecca, lepš za jaje hetyja niaprostyja pracedury nichto nie viedaje», — kažuć miedyki i dadajuć, što kali zabory stvałavych kletak spyniacca i spyniacca transpłantacyi, to «mnohija nie vyžyvuć».
«Kankretna maje dzieci nie žyvuć bieź pieralivańniaŭ, za sutki ŭ našym centry jany robiacca 10-20 pacyjentam, my ŭsie vielmi zaležym ad raboty adździaleńnia Daroninaj», — kaža inšy miedyk.
Viadoma, što Daronina nie maŭčała: jana skazała svajo słova ŭ videazvarocie miedykaŭ, pa-biełarusku acharaktaryzavała situacyju ŭ Biełarusi jak «hłabalny kanflikt rozumu i tupaści, hodnaści i źvierstva, vychavańnia i chamstva — kali jašče daviadziecca nadavać batanikam pa mordach?»
Jaje kalehi kažuć pra biezumoŭnuju padtrymku pryncypaŭ Daroninaj u adstojvańni pazicyi suprać katavańniaŭ, hvałtu i represij. Vyrašajuć, jak u hetaj situacyi jany mohuć padtrymać kalehu.
Bo i biez taho kalektyŭ RNPC dziciačaj ankałohii mocna asłableny: niekalki dzion na rabocie nie było dvuch miedykaŭ łabaratoryi kryvi — Anhieliny Adamonis i Valanciny Charytonavaj, jakich paśla žanočaha maršu zatrymali i dali sutki.
