Pavał Martynaŭ, kadr ź videa UUS Mahiloŭskaha abłvykankama
U Mahilovie ŭdzielnika pratestavaj akcyi pakarali administracyjnym aryštam, a ź izalatara zabrali ŭ vojska. Milicyja śćviardžaje, što małady čałaviek pajšoŭ na pratest za hrošy. Maci ličyć, što syna zapałochali i jon abhavaryŭ siabie.
Milicyja: za ŭdzieł u prateście abiacali zapłacić 55 rubloŭ
Upraŭleńnie ŭnutranych spraŭ Mahiloŭskaha abłvykankamu na svaim sajcie raźmiaściła publikacyju pra 19-hadovaha ŭdzielnika miascovaj akcyi pratestu, jaki pajšoŭ na jaje, bo, jak śćviardžajecca, jamu paabiacali zapłacić 55 rubloŭ. Adznačajecca, što z saboju na pratest jon uziaŭ dva nažy i pry im była pałka. Uvahu milicyjantaŭ junak pryciahnuŭ, bo byŭ u bałakłavie.
Imia maładoha čałavieka, zatrymanaha 23 vieraśnia, u publikacyi nia zhadvajecca. Na videa jahony tvar nie zaretušavali. Jaho pakazvajuć u medyčnaj mascy. Adznačajecca, što za ŭdzieł u «niesankcyjanavanym masavym mierapryjemstvie» Leninski rajonny sud Mahilova pakaraŭ jaho administracyjnym aryštam. Maładziona adličyli ź kaledžu i adpravili ŭ vojska, bo takim čynam jon pazbyŭsia adterminoŭki.
Pravaabaroncy: u historyi šmat sumnieŭnych akaličnaściaŭ
Mahiloŭskija pravaabaroncy z pazbaŭlenaha rehistracyi centru «Viasna» sačyli za losam maładoha čałavieka. Zavuć jaho Pavał Martynaŭ. Jon byŭ asudžany na 14 dzion aryštu. Pravaabaroncy ŭstrymlivajucca kamentavać historyju z Paŭłam, bo ŭ joj šmat sumnieŭnych akaličnaściaŭ. Pa zatrymańni junaka niamała jahonych kantaktaŭ u telehram-čatach trapili pad administracyjny pieraśled.
Maci: na videa syn havoryć razhublena i nia ŭpeŭniena
Paŭłava maci Alesia Alaksiejeŭna kaža, što syn, idučy na akcyju pratestu, nia mieŭ złačynnych namieraŭ. Pavodle jaje, jon mieŭ častku vudzilna, jakuju paprasili ŭziać znajomyja, a taksama nož, jaki jon vykarystoŭvaŭ dla ramontu rovara i nasiŭ pry sabie.
Surazmoŭca nia vieryć u toje, što syn pajšoŭ na pratest za hrošy. Kaža, synu hrošaj chapała, bo ŭ jaho była niebłahaja stypendyja. Hrošy, pakazanyja na videa, nastojvaje jana, byli źniatyja napiaredadni zatrymańnia z synavaj kartki.
Alesia Alaksiejeŭna adznačaje, što Pavał na pratest pajšoŭ pieršy raz i, mahčyma, «nie zusim ujaŭlaŭ, kudy idzie». Jaho zatrymali, kali pratestavaja akcyja ŭžo skončyłasia. Maci dapuskaje, što syna prymusili skazać toje, što jon havoryć na videa.
«U jaho zaŭždy svoj punkt hledžańnia. Jon samastojny čałaviek. Ale na videa havoryć razhublena i niaŭpeŭniena. Ja jaho ŭbačyła takim upieršyniu za 19 hadoŭ. Ja razumieju, što dzicia prosta zapałochali», — kaža žančyna.
Medyčnuju kamisiju prachodziŭ, adbyvajučy pakarańnie
Alesia Alaksiejeŭna kaža: syn prabyŭ u izalatary 7 dzion i ciapier užo ŭ vojsku. U jaho była adterminoŭka praz prablemy z sercam i padazreńnie na osteachandroz. Chłopiec nie paźbiahaŭ słužby.
«Jaho zavieźli ŭ kaledž napisać zajavu na akademičny vodpusk, i ŭžo z telefona kamandzira častki jon paviedamiŭ, što «sa mnoju ŭsio narmalna, ja jedu ŭ armiju». Što z synam, nia viedaju, pakul nia ŭbaču jaho asabista», — apaviadaje Alesia Alaksiejeŭna.
Pavodle žančyny, medyčnuju kamisiju syn prachodziŭ, adbyvajučy pakarańnie ŭ izalatary. Rodnyja jaho nia bačyli. Maci hutaryła z kamandziram častki, i toj jaje zapeŭniŭ, što prablemaŭ z prachodžańniem słužby ŭ syna nia budzie.
«Dyjahnazy ž zastajucca pad pytańniem, — adznačaje jana. — U jaho časam niamiejuć ruki i nohi. U kaledžy niejak praz aniamieńnie nia moh navat karotki čas havaryć».
