Siońnia prykładna a 18-aj ŭ 104-ym mikrarajonie Homiela prachodziŭ pieratrus u domie šmatdzietnaj siamji. Paru nie tolki abvinavačvajuć u administracyjnym pravaparušeńni, ale i zaviali kryminalnuju spravu. Jak «Mocnym Navinam» raspaviała Natalla Śniažkova, u niadzielu 27 vieraśnia prykładna ŭ 21.50 zatrymali jaje muža. Na nastupny dzień jaho asudzili za ŭdzieł u akcyi na 14 sutak i adpravili ŭ IČU.
Pa hetym samym artykule skłali pratakoł i na Natallu — maci piaciarych dziaciej.
Siońnia dniom u škołu da jaje dački prychodzili supracoŭniki pravaachoŭnych orhanaŭ. Pa słovach maci, 11-hadovaje dzicia apytvała milicyja ŭ prysutnaści nastaŭnika i sacyjalnaha piedahoha. Što pytalisia — nieviadoma.
Paźniej u RAUS na razmovu vyklikali i samu žančynu, adnak jana paprasiła supracoŭnikaŭ pryjechać da jaje dadomu. Jany i pryjechali ź pieratrusam.
Nakolki viadoma «Mocnym Navinam», u dačynieńni kahości z členaŭ siamji zaviedziena kryminalnaja sprava pa artykule 363 častka 2 — supraciŭ supracoŭniku orhanaŭ unutranych spraŭ, spałučany z užyvańniem hvałtu abo z pahrozaj jaho prymianieńnia. Sankcyja hetaha artykuła praduhledžvaje pazbaŭleńnie voli na termin da 5 hadoŭ.
Paśla pieratrusu žančynu zatrymali. Jaje niepaŭnaletnich dziaciej advieźli ŭ sacyjalny centr. Apiekunom možna było b pryznačyć starejšaha brata, kali b nie adno «ale» — jon biespracoŭny. Dziaciej jamu addaduć, tolki paśla taho, jak jon uładkujecca na pracu.
