Bieł-čyrvona-bieły karparatyŭ Rozum Robotics ledź nie zaviaršyŭsia na Akreścina. Pra heta napisaŭ u siabie ŭ Facebook CEO kampanii Viktar Chamianok. Partał dev.by daviedaŭsia ŭ jaho padrabiaznaści.
Viktar raspaviadaje, što karparatyŭ prymierkavany da dnia naradžeńnia kampanii. Dzień byŭ «znakavy dla ŭsich biełarusaŭ», udakładniaje surazmoŭca dev.by — «mienavita 19 vieraśnia 29 hadoŭ tamu byŭ pryniaty naš ściah i hierb, a kraina stała nazyvacca Respublika Biełaruś». Kamanda vyrašyła sumiaścić śviaty.
— My prydumali łahatyp na majki — vielmi prosty i vielmi łahičny: dźvie pałasy — viadomy kožnamu ź pieršaha kłasa škoły znak roŭnaści. Krychu paźniej da jaho prykłaŭsia słohan: «Svaboda! Roŭnaść! Braterstva!» — napisaŭ Viktar.
Na karparatyvie ŭ R-park pad Zasłaŭjem usie supracoŭniki byli mienavita ŭ hetych majkach.
— I voś my pryjechali — usie razbrylisia: chtości łaziŭ pa viaroŭkach, chtości pajšoŭ hulać u strajkboł, a chtości zastaŭsia hatavać ježu. A ŭ susiedniaj altancy adpačyvali nastaŭniki, adznačali dzień viedaŭ. I tut adna ź ich padyšła da nas i skazała: «U mianie muž amapaviec, prybiarycie ŭsio heta biazładździe — hetyja ściahi!» My ŭ adkaz patłumačyli joj, jaki ŭ subotu byŭ dzień — i dla nas, i dla krainy. Na što jana skazała: «Dzień durnia siońnia!» — raźviarnułasia i pajšła.
Potym da nas padyšli inšyja nastaŭniki. Skazali: «Pasłuchajcie, my ludzi adekvatnyja, a jana — nie, jana sabrałasia milicyju vyklikać». Što rabić: «Niachaj vyklikaje!» Ale potym usio ž my adpravili delehacyju — pahavaryć ź joj. Našy chłopcy skazali: «Navošta nam svarycca: my adzin narod». A jana zadziaŭbła, što my durni, i joj niepryjemna hladzieć, jak my «śviatkujem svaju pieramohu».
Viktar kaža, što padklučyłasia navat administracyja ŭstanovy. Jany padyšli da kamandy Rozum Robotics i paprasili ich nie zdymać majki «pad naciskam susiedniaj altanki, choć jany i aktyŭna pratestujuć suprać vas». «My za vas», — skazali.
— Praź niejki čas pryjechała 4 čałavieki — dvoje ź ich u cyvilnym, miarkujučy pa ŭsim, z Zasłaŭja. Padyšli da nas. My raspaviali im, što my ajcišniki, adpačyvajem — ni z kim nie svarymsia. My ŭžo pasiabravali z hetymi nastaŭnikami za hety čas — jany kazali milicyjanieram: «Naša kaleha nieadekvatnaja» i «Kali vy ich zabiarecie, my ź imi pajedziem».
Kapitan, jaki byŭ za hałoŭnaha, zusim razhubiŭsia: «Dyk što mnie rabić? U adździaleńni pytajucca, dasyłać atrad AMAPa ci nie?» Ja adkazaŭ: «Dasyłajcie! Budzie afihiennaja historyja, kali cełuju ajcišnuju kampaniju z karparatyva zahrabuć za majki». Tady jany raźviarnulisia i pajšli.
Viktar kaža, što karparatyŭ Rozum Robotics pradoŭžyŭsia ŭ vialikaj kampanii — ajcišniki i nastaŭniki. «Žonka amapaŭca», jakaja vyklikała milicyju, śviatkavała u svajoj altancy ź nievialikaj hrupaj kaleh.
