Siońnia prajšła infarmacyja, što namieśnikam mera Jałty ŭ anieksavanym Krymie pryznačany były staršynia Smalavickaha rajvykankama Michaił Zahorcaŭ, rajonam jon kiravaŭ amal 10 hod — z 2011-ha. U žniŭni padčas lačeńnia były čynoŭnik zapisaŭ videazvarot, u jakim asudžaje dziejańni siłavikoŭ, źviartajecca da vysokich čynoŭ, ź jakimi znajomy asabista, i prosić prabačeńnia ŭ maładoha pakaleńnia za toje, što kraina akazałasia ŭ takoj niaprostaj situacyi.
Pryvodzim test zvarotu całkam:
«Da vas źviartajecca były staršynia Smalavickaha rajvykankama Zahorcaŭ Michaił Haŭryłavič. Ja znachodžusia na lačeńni paśla šmatlikich apieracyj. U maim žyćci byli dźvie kliničnyja śmierci. Ja bajaŭsia ciapier tolki adnaho — pamierci i nie pabačyć Biełaruś volnaj. Ale našy dzieci, jany zrabili heta. Našy žančyny, dziakuj im ahramadny za ŭsio.
Naša pakaleńnie, my prosim prabačeńnia va ŭsich, što dapuścili heta. Byłyja kalehi, mery haradoŭ, staršyni, jašče nie pozna, nie dapuścicie bolej nijakaha krovapralićcia. Vy bačyli, što ludzi vyrašyli źmianić, my ŭ hetym pieraškodzili, ale jašče nie pozna vypravicca i iści razam z narodam.
Maładyja hienierały, Vasiljeŭ Saša, Ščerbačenia Ihar, Kavalčuk Saša, — vy nadzieli hienieralskija łampasy, ja viedaŭ pra vas jak pra vydatnych mužčyn-aficeraŭ. Mabyć, łampasy pieracisnuli vam niejkija orhany. Vam nie treba vybačacca, tut vybačeńni, jakija prynios Karajeŭ, zališnija. Vy padumajcie pra Biełaruś, što treba zrabić sapraŭdnym mužčynam-aficeram.
Spadar Karajeŭ, vy zhadali pra svaich dziaciej, pra svaju siamju. Čamu vy nie pamiatajecie pra našych dziaciej? Tut šmat razmoŭ pra rasijski śled. Tut składana pavieryć, my da hetaha času nie možam pavieryć, što našy biełarusy mohuć tak ździekavacca ź dziaciej i žančyn. Ale kali heta rasijanie, ja źviartajusia da meraŭ haradoŭ-pabracimaŭ, dyrektaraŭ zavodaŭ. Tak, my byli izalavany, my nie bačyli i nie razumieli, što adbyvajecca, kali my pabačyli ŭ internecie — darosłyja zdarovyja mužyki rydali. Ja im skazaŭ: nie puskajcie siudy svaich synoŭ. My lubim rasijan, ale kali jany pryjduć, zhadajcie 41-45 hod — ustanie kožny biełarus, my hetaha nie dapuścim nikoli bolej.
Ja hanarusia svaimi dziećmi, jakija pajšli ź pieršaha dnia na barykady, hanarusia švahram, hanarusia ŭsimi dziećmi, jakija pajšli, nie bajučysia ničoha. Kali možacie, darujcie nam, našamu pakaleńniu, my bolš nikoli nie dapuścim, kab takoje paŭtaryłasia, i naša Biełaruś budzie samaj pryhožaj i pryvablivaj krainaj. Dziakuj!
Ja heta zrabiŭ nie dla niejkich cikavych padziej, heta strašnyja padziei, u strašnym śnie my nie mahli ŭjavić, što heta moža adbyvacca ŭ našaj lubimaj krainie.
My razam, my ŭsio adno pieramožam — i naša kraina budzie volnaj i pryhožaj, jak naša lubimaja pryroda».
