25-hadovuju Maryju Babovič zatrymali 9 vieraśnia paśla taho, jak jana napisała hruntoŭkaj dźvie litary «Nie» ŭ nadpisie «Nie zabudziem» kala stancyi mietro «Puškinskaja». Ciapier dziaŭčyna na voli, ale na jaje zaviali kryminalnuju spravu za apahańvańnie zbudavańniaŭ i psavańnie majomaści. «Harramaŭtadoru» naniesieny ŭron bolš čym na 10 tysiač rubloŭ, skazana ŭ dakumientach. Piša TUT.BY.
9 vieraśnia Maryju Babovič i jašče adnaho minčuka zatrymali kala stancyi mietro «Puškinskaja». Jany sprabavali adnavić miemaryjał Alaksandru Tarajkoŭskamu — nadpis na asfalcie «Nie zabudziem».
Dziejańni dziaŭčyny zafiksavała kamiera videanazirańnia, milicyjanty advieźli zatrymanych u Frunzienskaje RUUS. Maryja kaža, što supracivu nie akazvała, siłu ŭ dačynieńni da jaje nie ŭžyvali.
— Noč z 9 na 10 vieraśnia my praviali ŭ kamiery. Ranicaj nas zabraŭ opierupaŭnavažany, u mianie ŭziali pakazańni, skazali raśpisacca — tam byŭ artykuł 339 KK RB (chulihanstva).
Z pratakołam dziaŭčyna pahadziłasia — u milicyi było videa, admaŭlać toje, što adbyvałasia, było biessensoŭna. Kopiju pratakołu dziaŭčyna nie atrymała.
Z RUUS na noč dziaŭčynu vazili ŭ haradski adździeł milicyi, 11 vieraśnia viarnuli ŭ Frunzienski RUUS. Śledčy adpuściŭ padazravanuju, paźniej jaje znoŭ vyklikali davać pakazańni. Tady dziaŭčyna ŭbačyła, što ŭ pastanovie paznačany inšy artykuł — 341 (Apahańvańnie zbudavańniaŭ i psavańnie majomaści) KK RB.
U pastanovie skazana, što Maryja Babovič i małady čałaviek nanosili nadpis na tratuarnaj darožcy, čym «ździejśnili psavańnie majomaści ŭ hramadskim miescy pry adsutnaści prykmiet bolš ciažkaha złačynstva».
Adznačajecca, što hetyja dziejańni nanieśli materyjalny ŭron Harremaŭtadoru Minharvykankama na ahulnuju sumu 10 182 rubli 52 kapiejki (bolš 377 bazavych vieličyń).
Dziaŭčynu šakuje vystaŭleny kryminalny artykuł «za dźvie litary» i vielizarnaja suma škody. Pavodle jaje słoŭ, farba, jakoj jany karystalisia — hruntoŭka, jana lohka zmyvajecca vadoj.
Advakat Maryi Andrej Mačałaŭ ličyć takuju vialikuju sumu škody i kryminalny artykuł za padobnyja dziejańni ciskam na ŭdzielnikaŭ akcyj.
