Minsk. Demanstranty złamali tradycyjny scenar niadzielnych demanstracyj. «Marš Hierojaŭ» rušyŭ u Drazdy — elitny kvartał z adnoj z rezidencyj Łukašenki i damami najvyšejšaj namienkłatury. Ludzi dajšli navat da doma Lidzii Jarmošynaj i pakinuli tam płakaty i padarunki.
Siłaviki sprabavali sarvać marš da jaho pačatku, masava zatrymlivajučy ludziej u punktach zboru. Paciarpieli ad dziejańniaŭ siłavikoŭ i chvasty kałon u časie paślapratesnych začystak. Pavodle źviestak MUS, u krainie zatrymali 774 čałavieki.
Zatrymańni, adnak, nie paŭpłyvali na kolkaść demanstrantaŭ — ich, jak i tydzień tamu, iznoŭ ahułam byli sotni tysiač. U asnoŭnaj kałonie na piku było bolš za 150 tysiač čałaviek (demanstranty prajšli tudy i nazad kala 20 km, nie ŭsie vytrymlivajuć maršrut całkam). Jašče 10 tysiač było ŭ kałonie, jakaja išła pa Navavilenskaj na Drazdy z paŭnočnaha boku i była razahnanaja AMAPam. Jašče kala 8 tysiač było ŭ hrupie demanstrantaŭ, jakaja sabrałasia za Minsk-Arenaj i taksama była raśsiejanaja.
Zatrymańni adbyvalisia na etapie zboru ŭ Hrušaŭcy, na Majakoŭskaha, Załatoj Horcy, na Mielnikajcie, kala Minsk-Areny, na Navavilenskaj. Na etapie razychodžańnia — kala mietro Puškinskaja.
Nie paŭpłyvali zatrymańni i na absalutna mirny charaktar šeścia. Adnak suśvietnyja ŚMI znoŭ abyšli dramatyčnyja karcinki palavańnia na ludziej u biełaruskaj stalicy.
Brest. Praz centr horada prajšła šmattysiačnaja kałona pratestoŭcaŭ. U adkaz na błakavańnie siłavikami płoščy Lenina pratestoŭcy zaniali skryžavańnie praśpiekta Mašerava i bulvara Kasmanaŭtaŭ. Jany vadzili karahody i pavodzili siabie vyklučna mirna. Kab razahnać ich, siłaviki ŭpieršyniu ŭžyli vadamiot.
Hrodna. Da piaci tysiač čałaviek vyjšli na vulicy i tut. Ułady znoŭ adkazali zatrymańniami. Zdajecca, zatrymali kala sotni čałaviek.
U niekatorych haradach zaškalvali emocyi. U Žodzinie milicyjant udaryŭ u tvar žančynu, jakaja zdymała pravaachoŭnikaŭ na telefon.
Pratesty ŭ roznaj formie adbylisia ŭ Viciebsku, Mahilovie, Lidzie, Navapołacku — tut demanstranty akazali supraciŭ sprobie zatrymańniaŭ, Maładziečnie, Pinsku, inšych haradach.
Iznoŭ horača było žurnalistam. Padčas chapuna kala płoščy Jakuba Kołasa była zatrymanaja hałoŭnaja redaktarka dev.by Natalla Pravalinskaja, a taksama žurnalist «Biełsata» Arciom Lava. Kali demanstranty razychodzilisia, siłavik šturchnuŭ z parapieta fotakarespandenta TASS. Uviečary ž u pabie zatrymali fatohrafa Alaksandra Vasiukoviča i pazaštatnaha karespandenta TUT.BY Uładzimira Hrydzina — ich tam zatrymlivali metava, inšych naviednikaŭ nie čapali.
U paniadziełak Alaksandr Łukašenka kirujecca ŭ Sočy na sustreču z Uładzimiram Pucinym na fonie pratestaŭ, jakija nie zhasajuć užo piaty tydzień, zachoŭvajučy mirny i nie antyrasijski charaktar.
Atmaśfieru Minska 13 vieraśnia najlepš pieradaje videa, jak babulki ŭ tramvai adčajna sprabujuć papiaredzić demanstrantaŭ, što zzadu nabližajucca siłaviki
