Kali pieršych pratestoŭcaŭ sud tolki papiaredžvaŭ, to z 9 vieraśnia staŭ pryznačać štrafy, piša Intex-Press.
Rabotniki avijazavoda, jakim było pryznačana słuchańnie 24 žniŭnia. Darja Vaščanka, Ihar Fiodaraŭ, Jaŭhien Pryščepaŭ, Mikita Arciuk (źleva naprava)
Rabotnikaŭ AAT «558 ARZ» z kanca žniŭnia sudziać za akcyi suprać falsifikacyi vybaraŭ i hvałtu, jakija jany pravodzili na praciahu niekalkich dzion paśla vybaraŭ prezidenta. Tady rabotniki pradpryjemstva vystrojvalisia ŭ łancuhi salidarnaści i rabili zaradku ŭ abiedzienny pierapynak kala prachadnoj zavoda. U vyniku hetaha ŭ dačynieńni da 22 rabotnikaŭ skłali pratakoły za administracyjnaje pravaparušeńnie. Paźniej pratestoŭcaŭ pačali vyklikać u sud.
Pieršy praces adbyŭsia 26 žniŭnia nad rabotnicaj Śviatłanaj Levaj. U hety dzień sudździa Mikałaj Kmita pryznaŭ Śviatłanu vinavataj u parušeńni punkta 23.34 KaAP i pryznačyŭ pakarańnie ŭ vyhladzie administracyjnaha aryštu terminam na dvoje sutak. Žančyna padała apielacyjnuju skarhu ŭ Brescki abłasny sud, tamu što ŭ jaje na ŭtrymańni znachodzicca niepaŭnaletniaje dzicia.
Usim nastupnym «parušalnikam», spravy jakich razhladalisia da 9 vieraśnia, sud albo vynosiŭ papiaredžańni, albo pieranosiŭ sudovyja pasiadžeńni. Potym ludziej sudździ pačali štrafavać.
Usiaho z 26 žniŭnia i pa 11 vieraśnia asudzili 16 rabotnikaŭ avijazavoda. Ź ich vosiem čałaviek atrymali papiaredžańni, raspavioŭ Intex-press Ihar Fiodaraŭ, rabotnik avijazavoda. Adnamu rabotniku sud pryznačyŭ štraf na sumu 54 rubli (2 bazavyja vieličyni), inšamu — 81 rubiel (3 BV). Jašče adzin rabotnik pa rašeńni suda byŭ aštrafavany na 216 rubloŭ (8 BV), a jašče troje «atrymali» pa 270 rubloŭ (10 BV).
11 vieraśnia adbyŭsia čarhovy sud, na jakim Iharu Fiodaravu, inžynieru-miechaniku avijazavoda, pryznačyli štraf u pamiery 20 bazavych vieličyń (540 rubloŭ). Ihar kaža, što prasiŭ u sudździ zamianić vypłatu štrafu na administracyjny aryšt, pakolki nie chacieŭ «papaŭniać štrafam kaznu dziaržavy». Ale sudździa Mikałaj Kmita žadańnie Ihara pamianiać štraf «na sutki» nie zadavoliŭ.
Sudovaha pasiadžeńnia čakajuć jašče piać rabotnikaŭ avijazavoda.
