Siońnia čatyrom zatrymanym supracoŭnikam PandaDoc vystavili abvinavačvańnie ŭ machlarstvie, ździejśnienym arhanizavanaj hrupaj albo ŭ asabliva bujnym pamiery (č. 4 art. 209 KK). Im pahražaje pazbaŭleńnie voli na termin ad troch da dziesiaci hadoŭ sa štrafam, pieradaje TUT.BY.
U pačatku vieraśnia čatyry supracoŭniki PandaDoc — hałoŭny buchhałtar Julija Šardyka, dyrektar Dźmitryj Rabcevič, mieniedžar pa pradukcie Viktar Kuŭšynaŭ i HR Uładzisłaŭ Michałap — byli aryštavanyja na dva miesiacy pa padazreńni ŭ kradziažy ŭ asabliva bujnym pamiery, u dačynieńni da ich była zaviedzienaja kryminalnaja sprava pa častcy 4 artykuła 210 KK Respubliki Biełaruś. Supracoŭniki padazravalisia ŭ tym, što jany jak hrupa asob, vykarystoŭvajučy svajo słužbovaje stanovišča, zavałodali hrašovymi srodkami ŭ pamiery kala 107 tysiač biełaruskich rubloŭ ź biudžetu, pryčyniŭšy tym samym škodu dziaržavie. Ich spravu pieradali ŭ centralny aparat Śledčaha kamiteta Biełarusi.
Siońnia, 11 vieraśnia, usim čaćviarym vystavili abvinavačvańnie, jak paviedamiŭ advakat kampanii PandaDoc Anton Hašynski, u machlarstvie, ździejśnienym arhanizavanaj hrupaj albo ŭ asabliva bujnym pamiery (č. 4 artykuła 209, choć raniej havorka išła pra č. 4 art. 210). Adnak, jak adznačaje advakat, abvinavačvańnie nie kankretyzavanaje, roli i dziejańni fihurantaŭ u ich nie raśpisanyja.
Abarona ličyć abvinavačvańnie nieabhruntavanym i ŭ paniadziełak padaść skarhu na mieru strymańnia i na pastanovu ab pryciahnieńni ŭ jakaści abvinavačanaha.
Sami supracoŭniki kampanii zajavili ab svajoj nievinavataści i kateharyčna adchilili vystaŭlenaje abvinavačvańnie.
