Kanfierencyja Katalickich Biskupaŭ u Biełarusi vykazvaje hłybokuju zaniepakojenaść u suviazi z tym, što 31 žniŭnia, pry pierasiačeńni dziaržaŭnaj miažy na pahraničnym pierachodzie Kuźnica Biełastockaja — Bruzhi Staršyni Kanfierencyi Katalickich Biskupaŭ u Biełarusi Mitrapalitu Minska-Mahiloŭskamu arcybiskupu Tadevušu Kandrusieviču było admoŭlena va ŭjeździe ŭ Biełaruś.
Niedapuščalna, što biskup Katalickaha Kaścioła, jaki źjaŭlajecca pastyram daručanych jamu viernikaŭ, pazbaŭleny mahčymaści znachodzicca va ŭłasnaj dyjacezii i nieści ŭ joj słužeńnie, daručanaje jamu Śviatym Ajcom Papam Franciškam.
Zabaronu na ŭjezd na terytoryju Biełarusi arcybiskupu Tadevušu Kandrusieviču, jaki źjaŭlajecca hramadzianinam Respubliki Biełaruś, Kanfierencyja Katalickich Biskupaŭ u Biełarusi ličyć niazhodnaj ź dziejučym zakanadaŭstvam Respubliki Biełaruś. Hetyja i padobnyja dziejańni asobnych orhanaŭ ułady nie spryjajuć budaŭnictvu kanstruktyŭnych adnosin pamiž dziaržavaj i Katalickim Kaściołam u našaj krainie, nie słužać źmianšeńniu napružanaści i pieraadoleńniu hłybokaha padziełu ŭ hramadstvie.
Kanfierencyja Katalickich Biskupaŭ u Biełarusi vykazvaje nadzieju na toje, što admova arcybiskupu Tadevušu Kandrusieviču va ŭjeździe ŭ Respubliku Biełaruś źjaŭlajecca tolki prykrym nieparazumieńniem, jakoje jak najchutčej budzie vyrašana, a taksama što padobnyja incydenty nie buduć adbyvacca ŭ budučyni.
Kanfierencyja Katalickich Biskupaŭ u Biełarusi źviartajecca da duchavienstva, kansekravanych asob i śvieckich viernikaŭ, a taksama da ŭsich ludziej dobraj voli z prośbaj ab ruplivaj malitvie ŭ intencyi jak maha chutčejšaha viartańnia arcybiskupa Tadevuša Kandrusieviča na Radzimu.
Ad imia katalickich biskupaŭ Biełarusi: Alaksandr Kaškievič, Biskup Hrodzienski, Vice-staršynia Kanfierencyi Katalickich Biskupaŭ u Biełarusi; Juzaf Stanieŭski, Dapamožny biskup Hrodzienskaj dyjacezii, Hienieralny sakratar Kanfierencyi Katalickich Biskupaŭ u Biełarusi.
