Advakat Viktara Babaryki Dźmitryj Łajeŭski prakamientavaŭ u svaim fejsbuku siužet ANT, u jakim była pakazanaja vočnaja staŭka Babaryki z v. a. staršyni praŭleńnia Biełhazprambanka Kiryłam Badziejem.
ANT pakazaŭ kadry vočnaj staŭki Babaryki z padnačalenymi. Babaryka nie kaža ni słova
Advakat nazyvaje siužet «kino, pra jakoje jašče składuć pieśni».
«Recept kino prosty: padpiski ab nierazhałošvańni (uziatyja z abarony, što abciažarvaje abviaržeńnie), mantaž (bo jość stolki niazručnych dla kino momantaŭ), zakadravy tekst (zaklikany likvidavać sumnievy ŭ tych, chto pryvyk vieryć i advyk dumać).
Raskazać paru skazaŭ tekstu pad videa — adno, dakazać dastatkovaść hetych słoŭ u sudzie — inšaje. Asabliva kali jość čym ich asprečyć. Spabornaść i publičnaść — niaprostyja ŭmovy, ich nie kožny aktor vytrymaje, a ŭžo źmieščany ŭ SIZA abyvaciel — tym bolš. Tamu repietycyi pačalisia maštabna. Ździŭlaje tolki nizkaprobnaść.
Dakładna skažu adno: kali dastatkova dokazaŭ, kino pakazvać niama patreby.
Raz kino źjaviłasia, značyć hroš cana scenaru.
A naohuł my radyja hetamu «ŭzvažanamu» kroku aŭtaraŭ, tamu što ciapier usio vyhladaje jašče bolš absurdna i źjaviŭsia vialiki prastor dla adkazu, jaki nie prymusić siabie čakać», — piša Łajeŭski.
Telekanał nie daje słova ani Babaryku, ani jaho advakatam ci pradstaŭnikam, kab jany padali svaju viersiju padziej, a zapis pry hetym maje zmantažavany charaktar.
Varta adznačyć, što pakaz vočnaj staŭki ŭ ŚMI taksama piarečyć jak tajamnicy śledstva, tak i prezumpcyi nievinavataści.
