Praktyčna štodnia fiksujucca fakty raźmiaščeńnia ŭ hramadskich miescach roznych nadpisaŭ, MUS nahadała pra adkaznaść za padobnyja dziejańni, a taksama apublikavała videa z prabačeńniami ludziej, jakich złavili i pakarali za heta.
«Mižvoli zadaješsia pytańniem: čamu, kali paškodziać asabistuju majomaść, niachaj heta budzie padrapanaja mašyna abo pałamany płot, paciarpieły z zajavaj śpiašajecca ŭ milicyju, a kali nanosicca škoda, pa sutnaści, našaj ahulnaj majomaści, usie ci amal usie prachodziać mima?» — ździŭlajecca ministerstva.
Tak, na dniach u Červieński RAUS źviarnulisia pradstaŭniki Ladzienskaha sielskaha vykankama. Jany paviedamili, što na darožnym znaku i prypynku hramadskaha transpartu farbaj naniesienyja roznyja nadpisy, a na vulicach ahraharadka raskidanyja ŭlotki.
Nieŭzabavie supracoŭniki milicyi vyjšli na śled mierkavanaha parušalnika — 18-hadovaha miascovaha žychara. Małady čałaviek całkam pryznaŭsia ŭ zroblenym i raskajaŭsia. U raspaŭsiudzie ŭlotak jamu dapamahaŭ 56-hadovy baćka.
Syna i baćku aštrafavali na 675 i 540 rubloŭ. Akramia taho, za naŭmysnaje paškodžańnie darožnaha znaka i aŭtobusnaha prypynku mužčyna aštrafavany na 1080 rubloŭ. U vyniku ahulnaja suma štrafaŭ dla siamji skłała 2295 rubloŭ..
A ŭ Maładziečnie 3 lipienia supracoŭniki milicyi padyšli da 32-hadovaha miascovaha žychara, jaki padazravaŭsia ŭ ździajśnieńni administracyjnaha pravaparušeńnia, i zrabili zaŭvahu. Mužčyna zdymaŭ toje, što adbyvajecca, na telefon i «akazaŭ niepadparadkavańnie zakonnym patrabavańniam supracoŭnikaŭ milicyi». Žychar Maładziečna taksama pryznaŭ vinu i paprasiŭ prabačeńnia za svaje dziejańni. Jaho aštrafavali na 270 rubloŭ.
U Maładziečnie chłopca aštrafavali za toje, što sfotkaŭ aŭtazak
Mužčynu na videa zavuć Alaksandr Novik.
«RH» źviazałasia z Alaksandram, kab toj prakamientavaŭ videazapis.
— Nie bačyŭ heta videa. Mianie nie prymušali, ale pamiataju, jak zdymali. Zdymaŭ čałaviek, jaki byŭ u cyvilnym. Jon skazaŭ, što zapisvaje videa na ŭsialaki vypadak, kali ja jašče raz što-niebudź takoje zrablu. Nie kazali, što heta videa budzie ŭ internecie.
