Knihi «Sfahnum» Viktara Marcinoviča i «Radziva Prudok» Andrusia Horvata ekranizujuć. Infarmacyju pra heta źmiaścili na sajcie Nacyjanalnaha centra markietynhu i kanjunktury cen.
Viktar Marcinovič. Fota: Darja Burakina, tut.by
Ekranizacyjaj «Sfahnuma» zojmiecca TAA «Kinakampanija «Demarš-film». Heta budzie ihravy film na ruskaj movie, taksama vyjdzie viersija z anhlijskimi subtytrami. Žanr — «moładzievaja fantastyčnaja/mistyčnaja trahikamiedyja». Chronamietraž, zhodna z dakumientami, składzie nie mienš za 90 chvilin, skončyć vytvorčaść pavinny na praciahu piatnaccaci miesiacaŭ ad daty padpisańnia damovy.
— Režysioram «Sfahnuma» budzie Viktar Aśluk, čalec Jeŭrapiejskaj kinaakademii. Pradziusar — Valeryj Dmitračenka z kampanii «Demarš-film», jakaja rabiła «Kryštal» Darji Žuk, — paviedamiŭ tut.by Anton Sidarenka, kinakrytyk i hałoŭny redaktar Nacyjanalnaj kinastudyi «Biełaruśfilm» u 2017—2020 hh.
Raman Viktara Marcinoviča «Sfahnum» vyjšaŭ u 2013 hodzie. Krytyki charaktaryzavali jaho jak «hanhstarskuju kamiedyju». U miesiac vychadu raman staŭ lidaram prodažaŭ u biełaruskaj sietcy kramaŭ «Biełkniha».
Zdymkami filma «Radziva Prudok» zojmiecca TAA «Pieršaja Kinavideakampanija». Stužka budzie na biełaruskaj i ruskaj movach, taksama płanujecca viersija z subtytrami na anhlijskaj. Žanr filma — liryčnaja kamiedyja, chronamietraž — 100 chvilin, termin vytvorčaści filma — na praciahu adzinaccaci miesiacaŭ ad daty padpisańnia damovy.
— «Radziva Prudok» budzie zdymać debiutant Alaksiej Rakovič i «Pieršaja Kinavideakampanija» pradziusara Viktara Łabkoviča, jakaja niadaŭna atrymała zakaz na film «Pieśniary», — paviedamiŭ Anton Sidarenka.
Historyja knihi «Radziva Prudok» takaja: Andruś Horvat pracavaŭ dvornikam u Kupałaŭskim teatry. Letam 2015-ha Horvat zvolniŭsia z teatra i źjechaŭ na stałaje miesca žycharstva ŭ viosku Prudok. Jaho zapisy ŭ fejsbuku, jakija raskazvali ab žyćci ŭ Prudku, stali źbirać vialikuju aŭdytoryju. Pastupova ź ich skłałasia kniha. Jana vyjšła ŭ kancy 2016 hoda i razam z kazoj Ciotkaj i inšymi hierojami ŭvarvałasia ŭ 2017-m u masavuju kulturu i pabiła rekordy pa chutkaści prodažaŭ: za adzin dzień prezientacyi dadrukavanaha nakładu razyšłosia 700 asobnikaŭ, a ahulny tyraž skłaŭ kala 3 tysiač. U 2018 hodzie pa knizie pastavili śpiektakl u Kupałaŭskim teatry.
Abodva filmy zdymuć častkova za srodki ź dziaržaŭnaha biudžetu. Košt vytvorčaści «Sfahnuma» składaje 1 600 000 rubloŭ (1 120 000 ź ich — ź biudžetu). Košt «Radziva Prudok» — 982 000 (630 098 ź ich biudžetnyja). Astatniuju častku sumy kinakampanii mohuć prafinansavać z ułasnych srodkaŭ abo inšych krynic, nie zabaronienych zakanadaŭstvam.
