«Naša Niva» publikavała historyju treniera Biełaruskaha dziaržaŭnaha ŭniviersiteta fizičnaj kultury Siarhieja Šabanava. Chłopiec raskazvaŭ, što jamu nie stali praciahvać kantrakt paśla jaho admovy padpisacca za dziejnaha prezidenta.
Fota sa staronki «UKantakcie»
Voś jak Siarhiej apisvaŭ toj incydent.
«Ja zachodziŭ padpisvać zajavu na adpačynak. A tam jakraz byli ludzi, jakija zajmajucca zboram podpisaŭ. I kiraŭnica BRSM, jakaja mianie nie viedała, pytajecca: «A ty ŭ nas chto? Padpisvaŭsia?» Ja hučna pačynaju śmiajacca. Kažu: padpisvacca nie budu. Tut u kabiniet uryvajecca kiraŭnictva i pačynaje mnie tłumačyć, što ja niapravilna rablu i što ŭ našym univiersitecie ja ŭžo pracavać nie budu».
U rektaracie kamientavać ničoha nie stali i zrabili vyhlad, što nie ŭ kursie, pra kaho idzie razmova.
Trenier Univiersiteta fizkultury admoviŭsia stavić podpis za Łukašenku — i jamu nie praciahnuli kantrakt
Paźniej na situacyju adreahavała Ministerstva pracy i sacyjalnaj abarony.
«Asnoŭnaja vysnova — namier najmalnika zvolnić Šabanava nie paćviardžajecca. Inicyjatyva sychodziła vyklučna ad samoha rabotnika», — śćviardžajuć u viedamstvie.
Zajavu Siarhiej padaŭ 29 maja, a kantrakt zakančvaŭsia 8 lipienia. «To bok zajava ab zvalnieńni napisana našmat raniej za miesiačny termin, ustalavany zakanadaŭstvam. U dadzienym vypadku termin paviedamleńnia ad kiraŭnictva ŭniviersiteta i Šabanava nadychodziŭ nie paźniej za 7 červienia», — padkreślivajuć u ministerstvie.
I dadajuć, što rektarat nie mieŭ namieru zvalniać rabotnika i nie płanuje skasoŭvać jaho pasadu. Bolš za toje, pajšoŭ nasustrač Siarhieju i daŭ jamu vodpusk całkam raniej, čym heta było praduhledžana hrafikam. Dziakujučy hetamu trenier atrymaŭ dapamohu na azdaraŭleńnie ŭ poŭnym pamiery.
«U chodzie sustrečy z pradstaŭnikami Ministerstva Šabanaŭ paćvierdziŭ, što rašeńnie ab zvalnieńni prymaŭ sam, i ŭśviedamlaje, što najmalnikam zakanadaŭstva ab pracy nie parušałasia», — padsumoŭvaje Minpracy i sacabarony.
Siarhiej Šabanaŭ nie admaŭlaje: zajavu nasamreč padaŭ jon, ale nie pa svaim žadańni.
«Jana była napisana pad ciskam zapisu ŭ pracoŭnaj knižcy pra toje, što ŭniviersitet raźvitvajecca sa mnoj, a nie ja ź imi. Z takoj paznakaj paśla składana znajści pracu: kali treniera jość za što zvolnić, značyć heta nie prosta tak.
Ja ŭ ministerstvie paŭhadziny heta tłumačyŭ. Jany skazali, što z punktu hledžańnia pravavoha pola ŭniviersitet maje racyju», — patłumačyŭ chłopiec «Našaj Nivie».
