Siarhiej Cichanoŭski padčas strymu 20 maja 2020 hoda, fota Siarhieja Kamkova
Siońnia ŭ Hrodnie prajšoŭ čarhovy sud nad Siarhiejem Cichanoŭskim. Sam błohier ciapier znachodzicca ŭ SIZA № 1 u Miensku, tamu ŭ sudzie ŭdzielničaŭ pa videasuviazi (jamu siońnia farmalna dali 15 sutak administracyjnaha aryštu). Ubačyŭšy kadry ź Cichanoŭskim, mnohija nie pavieryli, što heta jon: čałaviek na videa zusim nie padobny da błohiera, jakim biełarusy pryvykli jaho bačyć. TUT.BY spytaŭ u Śviatłany Cichanoŭskaj, ci paznała jana svajho muža na kadrach z Hrodzienskaha suda.
Siarhiej Cichanoŭski 1 lipienia 2020 hoda ŭ sudzie, fota Viasny
— Heta dakładna Siarhiej, heta jahonyja vušy — adno vucha trochi adtapyranaje, ruki, jahonyja žesty — ja ich paznaju. Ale ja ŭ šoku, ja siońnia płakała, ubačyŭšy hetyja fota. Takim źniasilenym, takim chudym ja jaho nikoli nie bačyła. Jašče hetaja stryžka … jon zusim nie padobny da siabie, ale heta jon, — skazała Śviatłana Cichanoŭskaja.
Pa fota zdajecca, što Siarhiej Cichanoŭski za miesiac, jaki prajšoŭ ź jahonaha zatrymańnia, schudnieŭ minimum na 20 kh.
Siarhiej Cichanoŭski ŭ sudzie 1 lipienia 2020 hoda, fota Radyjo Svaboda
U pierapynku pierad abviaščeńniem prysudu Cichanoŭski paśpieŭ parazmaŭlać z prysutnymi ŭ zale. Na videa z zały suda, apublikavanym «Biełsatam», jon skazaŭ, što hrošy, jakija znajšli ŭ jaho doma, nie jaho: ich jamu padkinuli.
— Nu heta [kiraŭnik KDB Valeryj] Vakulčyk padkinuŭ pa rasparadžeńni Łukašenki, — miarkuje Cichanoŭski.
— Heta jašče ŭsio było viadoma ŭ Hrodnie, jon ža zajaviŭ, što «ŭ ich hrošy tam niejkija», heta sam Łukašenka skazaŭ, tolki potym padkinuli. Kali vy pahladzicie chranałohiju, — skazaŭ Cichanoŭski.
Nahadajem, 13 červienia Siarhieja Cichanoŭskaha źmiaścili ŭ karcar u SIZA №1. 20 červienia padoŭžyli znachodžańnie ŭ karcary da 26 červienia. Śviatłana Cichanoŭskaja zajaviła, što vielmi zaniepakojenaja dadzienaj situacyjaj, i paprasiła ŭsich padtrymać jaje muža. Advakat Cichanoŭskaha Viktar Mackievič raspaviadaŭ, što da błohiera ŭžyli dva spahnańni, kožnaje — pa siem sutak źmiaščeńnia ŭ karcary. Pieršaje spahnańnie vynieśli, kali jon jašče znachodziŭsia ŭ zvyčajnaj kamiery, za parušeńnie režymu. Druhoje — kali jon užo znachodziŭsia ŭ karcary, za drennuju ŭborku pamiaškańnia: sa słoŭ Cichanoŭskaha, u kamiery pad trochmietrovaj stollu supracoŭniki SIZA vyjavili pavucińnie.
