Internet-partał Tuzin Hitoŭ i hramadzkaja kampanija Budźma biełarusami pačali muzyčny prajekt «Tuzin. Pierazahruzka». Ajčynnyja niebiełaruskamoŭnyja vykanaŭcy roznych stylaŭ zapišuć svaje chity pa-biełarusku.
Zhodu na ŭdzieł u prajekcie dali muzyki Hair Peace Salon. Heta adna z samych cikavych indy-rok-kamandaŭ Biełarusi, jakaja ad momantu svajho zasnavańnia ŭ 1998 hodzie karystałasia ŭ svaich pieśniach vyklučna anhlijskaj movaj. “Ideja zaśpiavać pa-biełarusku zavabiła nas tym, što heta absalutna novy vitok u našaj tvorčaści, jaki moža pryciahnuć bolšuju kolkaść słuchačoŭ. Miarkujem, što nas abaviazkova padtrymajuć našy raniejšyja prychilniki”, -- kažuć muzyki.
Hety hurt adroźnivajecca nadzvyčaj hruntoŭnym padychodam da svajoj tvorčaści. Letaś jany spravili svajo 10-hodździe, ale ŭ słuchackaj śviadomaści praciahvajuć asacyjavacca z “maładymi i jaskravymi debiutantami”. Pierad tym, jak dać svoj pieršy kancert, Hair Peace Salon repietavali ažno čatyry hady. Nad pieršym synhłam pracavali ciaham troch hod, a poŭnavartasny albom pišuć dahetul. Pry tym maralnym i materyjalnym uniosku, ich apošniaje kalekcyjnaje vydańnie EP «In Tune» možna nabyć pa demakratyčnaj canie – 5 000 rubloŭ. “My prapanujem naš dysk tym, chto lubić usialakija karobački, kalarovyja dyski, kartonnnyja bukleciki, ale samaje hałoŭnaje naš hurt”, -- viadziecca ŭ reklamie ich samotnika. Na samoj spravie svajo paklikańnie muzyki bačać kudy ŭ bolš surjoznych rečach – złamać stereatypy razumieńnia papularnaj kultury, jakija abmiažoŭvajuć duchoŭnuju svabodu.
Hair Peace Salon možna nazvać adviečnymi finalistami. Jany byli łaŭreatami ci spynialisia ŭ kroku ad pieramohi na takich festach, jak The Global Battle Of the Bands, Bandscan:Belarus, “Rok-Karanacyja”, “Załataja akustyka” dy inšyja. Svoj styl jany vyznačajuć, jak brytanski indy-rok, a tamu i piajuć užo 11 hod tolki pa-anhlijsku.
Dla svajho biełaruskamoŭnaha debiuta jany vyrašyli prapanavać pieśniu, što ŭ aryhinale zaviecca «Ice Age». Hałoŭnyja kreteryi vybaru – jana maje miełodyju i moc, tamu jaje vielmi lohka hrać. “Sens hetaj pieśni ŭ tym, što kožny z nas u žyćci sutykajecca ź “ledavikovym” pieryjadam, kali zusim aničoha nie ciešyć. Jon padajecca biaskoncym, ale raniej ci paźniej maje pierapynicca, kali trymacca svajoj mety i praŭdy”, -- kažuć muzyki.
Pieraasensoŭvać na biełaruski ład «Ice Age» uziaŭsia litaratar Vital Voranaŭ, jaki pierakłaŭ na biełaruskuju takija tvory, jak «U čakańni Hado» Biekieta i «Vinia-Pych» Miłna.
