Fota Nadziei Bužan
SK apublikavaŭ aficyjny pres-reliz nakont kiraŭnika inicyjatyŭnaj hrupy Śviatłany Cichanoŭskaj Siarhieja Cichanoŭskaha i niekalkich jaho paplečnikaŭ, zatrymanych u Hrodnie 29 maja.
Pavodle śledstva, 29 maja ŭ čas pikietu pa zbory podpisaŭ u Hrodnie było arhanizavana praviadzieńnie niezakonnaha hramadskaha mierapryjemstva, mitynhu, padčas jakoha ździejśnieny hrupavyja dziejańni, jakija hruba parušajuć hramadski paradak i spałučanyja ź vidavočnym niepadparadkavańniem zakonnym patrabavańniam milicyi. U vyniku hetych dziejańniaŭ paciarpieli dva supracoŭniki orhanaŭ unutranych spraŭ.
Siarhieju Cichanoŭskamu i jašče siami asobam vystavili abvinavačvańnie pa č. 1 art. 342 (arhanizacyja i padrychtoŭka dziejańniaŭ, što hruba parušajuć hramadski paradak) Kryminalnaha kodeksa Biełarusi, dziejańni adnaho ź ich dadatkova kvalifikavanyja śledstvam pa art. 364 (hvałt u dačynieńni da supracoŭnikaŭ orhanaŭ unutranych spraŭ) Kryminalnaha kodeksa Biełarusi. Pavodle pieršaha artykuła praduhledžvajecca štraf, abo aryšt, ci abmiežavańnie voli na termin da troch hadoŭ, abo pazbaŭleńnie voli na toj ža termin. Pavodle artykuła 364 — aryšt, ci abmiežavańnie voli na termin da piaci hadoŭ, abo pazbaŭleńnie voli na termin da šaści hadoŭ.
U chodzie śledčych dziejańniaŭ, vyvučeńnia videazapisaŭ ź miesca pikietavańnia, ustanoŭlena jašče adna asoba, što ŭžyvała hvałt da supracoŭnikaŭ milicyi, jakija dastaŭlali zatrymanych u słužbovy transpart. U dačynieńni da jaho raspačata kryminalnaja sprava.
Z sankcyi prakuratury da abvinavačanych prymieniena miera strymańnia ŭ vyhladzie zaklučeńnia pad vartu.
Pravodziacca śledčyja i inšyja pracesualnyja dziejańni. Pryznačana praviadzieńnie sudova-miedycynskich i inšych ekśpiertyz.
