Na mienskim zavodzie imia Vaviłava na tydzień u adpačynak adpraŭleny halvaničny cech. U im pracuje da 100 čałaviek. Pryčyna — u adnoj z rabotnic cecha znajšli karanavirus, paviedamlaje «Radyjo Svaboda».
Hetuju infarmacyju, jakuju ŭ aŭtorak, 31 sakavika, «Svabodzie» na ŭmovach ananimnaści pieradała krynica z pradpryjemstva, siońnia paćvierdzili ŭ administracyi zavodu. Z karespandentam «Svabody» pahadziŭsia sustrecca namieśnik hieneralnaha dyrektara zavodu imia Vaviłava Viačasłaŭ Kuźniacoŭ.
Viačasłaŭ Kuźniacoŭ paćvierdziŭ źviestki pra vypadak zachvorvańnia na karanavirus, spasłaŭšysia na dadzienyja sanitarnaj słužby Pieršamajskaha rajonu.
«U paniadziełak u druhoj pałovie dnia pazvanili z sanstancyi i skazali, što ŭ našaj pracaŭnicy znojdzieny karanavirus, test daŭ stanoŭčy vynik. U aŭtorak my pravieryli ŭsich pracaŭnikoŭ cechu, im zamiarali temperaturu. Prykmiet inšych zachvorvańniaŭ nia vyjavili, ale z metaj prafilaktyki prapanavali pracaŭnikam cechu da kanca tydnia pabyć na chatnim režymie. Z zachavańniem dźviuch trecich zarobku. To-bok hety cech, №13, sapraŭdy nie pracuje, ale ŭsio pradpryjemstva praciahvaje pracavać, jak raniej. U cechu №13 praviedzienyja patrebnyja sanitarnyja zachady», — paviedamiŭ Viačasłaŭ Kuźniacoŭ.
Što viadoma pra pracaŭnicu zavodu imia Vaviłava, jakaja zachvareła na karanavirus?
Pavodle namieśnika hiendyrektara zavodu spadara Kuźniacova, pracaŭnica, jakaja zachvareła na karanavirus, ciapier u špitali.
«Jaje stan stabilny. Našyja medyki štodnia ź joj źviazvajucca, paharšeńniaŭ niama».
Jak mahła zachvareć pracaŭnica zavodu, Viačasłaŭ Kuźniacoŭ źviestak nia maje. «Da taho, jak nam stała viadoma pra jaje chvarobu, jana była na balničnym. Viedajem, što niadaŭna za miažu jana nie vyjaždžała», — skazaŭ Viačasłaŭ Kuźniacoŭ. Pra ŭzrost chvoraj Viačasłaŭ Kuźniacoŭ skazaŭ: «Skažu hetak, nabližajecca da pieradpensijnaha».
Na mienskim mechaničnym zavodzie imia Vaviłava pracuje kala 2,5 tysiačy čałaviek. Na prachadnoj, praź jakuju prachodziać na pracu i pracaŭniki susiedniaha zavodu «Pelenh», vartaŭniki ŭžo siadziać u medyčnych maskach. Niekalki čałaviek u maskach vychodzili z pradpryjemstva, kali na prachadnoj afarmlali propusk dla karespandenta Svabody. «Ja sama ź inšaha cechu, ale viedaju, što jość vypadak karanavirusu na halvanicy. Tak, ale my pracujem», — skazała žančyna, jakaja siabie nie nazvała.
Što budzie dalej z 13-m cecham?
Pavodle namieśnika hiendyrektara zavodu imia Vaviłava Viačasłava Kuźniacova, pytańnie, ci zapracuje halvaničny cech praz tydzień, budzie vyrašacca na pačatku budučaha tydnia.
«Šmat zaležyć ad sumiežnikaŭ u Rasiei. Jany jakraz taksama tydzień nie pracujuć, tamu my možam sabie dazvolić adpravić halvaniku ŭ adpačynak, a jak budzie dalej, pahladzim», — skazaŭ spadar Kuźniacoŭ. Ź jahonych słovaŭ, jon padtrymlivaje kantakt ź niekatorymi pracaŭnikami 13-ha cechu, jakija ciapier na chatnim karantynie.
«Kažuć, u ich stan zdaroŭja narmalny, prosiacca na pracu», — skazaŭ Viačasłaŭ Kuźniacoŭ.
U 13-m cechu zavodu Vaviłava, jaki adpraŭleny ŭ adpačynak, pracuje da 100 čałaviek.
