tvn24.pl
Premjer-ministr Polščy Mateŭš Maraviecki abviaściŭ pra čarhovyja abmiežavańni ŭ suviazi z pandemijaj karanavirusa, paviedamlaje «Biełsat».
«My bačym, što heta patrebna i nieabchodna, kab zaścierahčysia ad situacyi, kali karanavirus budzie raspaŭsiudžvacca, jak u Italii dy Ispanii», — padkreśliŭ premjer-ministr padčas pres-kanfierencyi.
Ułady Polščy ŭvodziać abmiežavańni na pieramiaščeńni. Z domu možna vychodzić u kramu pa pradukty, kab adviedać blizkich svajakoŭ, u apteku, da doktara dy vyvodzić na špacyr sabakaŭ. Taksama asoby, što majuć pracu, jakuju niemahčyma vykonvać dystancyjna, buduć mieć prava vychodzić na vulicu, kab dabracca da miesca pracy i viarnucca damoŭ. Pad zabaronu pieramiaščeńniaŭ nie padpadajuć vałanciory, što dapamahajuć u baraćbie z epidemijaj.
Premjer-ministr taksama paviedamiŭ pra zabaronu vychodzić na vulicu u hrupach, bolšych za dźvie asoby (za vyklučeńniem siemjaŭ).
Taksama ŭ transpart treba siadać, kali zaniata nie bolej za pałovu pasadačnych miescaŭ.
Kantralavać zachavańnie praviłaŭ budzie palicyja, štraf za parušeńnie — da 5 tys. złotych (kala 1,5 tys. jeŭra). Novyja praviły ŭstupajuć u siłu ad 25 sakavika i buduć dziejničać da 11 krasavika.
«Pierad nami vielmi ciažkaja faza, bo novyja abmiežavańni buduć mocna ŭpłyvać na naša štodzionnaje žyćcio. Usie spravy, akramia vychadu ŭ kramu pa pradukty, u apteku pa leki dy vychad z sabakam na karotki špacyr, treba adkłaści», — dadaŭ Maraviecki.
Na siońnia ŭ Polščy 9 asobaŭ pamierli ad nastupstvaŭ infiekcyi, u krainie zarehistravali 774 vypadki zaražeńnia.
