Treci anłajn-fiestyval biełaruskaha dakumientalnaha kino BelarusDocs projdzie z 7 pa 13 krasavika. Za fiestyvalny tydzień možna budzie ŭbačyć siem admietnych filmaŭ siami biełaruskich aŭtaraŭ, nie vychodziačy z domu. Kožny ź filmaŭ fiestyvalu budzie dastupny dla anłajn-prahladu na praciahu 24 hadzin z anhlijskimi subcitrami na sajcie belarusdocs.com.
Pryznańnie biełaruskaha dakumientalnaha kino ŭ prafiesijnym asiarodździ kiniematahrafistaŭ nie vyklikaje sumnievaŭ. Tolki za 2018-2019 hady biełaruskija filmy atrymali ŭznaharody na viadučych fiestyvalach dakumientalnaha kino śvietu — Amsterdamskim IDFA, Krakaŭskim kinafestyvali, kinafiestyvali Go East u Niamieččynie, Artdokfeście (Maskva), ale ŭbačyć hetyja filmy žycharam Biełarusi amal niemahčyma. Anłajn-fiestyval BelarusDocs robić najlepšaje biełaruskaje kino dastupnym dla kožnaha.
Anłajn-fiestyval BelarusDocs — heta bijenale aktualnaha biełaruskaha dakumientalnaha kino. Papiarednija fiestyvali z pośpiecham prachodzili ŭ 2016 i 2018 hadach. Prahrama BelarusDocs farmirujecca ź filmaŭ, jakija adlustroŭvajuć važnyja dla biełaruskaha hramadstva temy, majuć mastackija jakaści i zazvyčaj — dobruju fiestyvalnuju historyju.
U prahramu BelarusDocs-2020 uvajšli 7 filmaŭ. Pryvodzim ich razam z datami pakazu i apisańniem:
7 krasavika — «Trenier»
2019, režysior — Volha Abramčyk
Film-udzielnik fiestyvalaŭ «Docudays UA» (Kijeŭ), «Artdokfest» (Maskva) i «Listapad» (Minsk)
Aleh Kiryłaŭ — trenier zbornaj Biełarusi pa intuityŭnym futbole. Jaho padapiečnyja — nieviduščyja. U kožnaha svaja historyja, svoj šlach u vialiki sport, ale siońnia pierad imi staić ahulnaja zadača — pieramahčy.
8 krasavika — «Debiut»
2017, režysior — Nastaśsia Mirašničenka
Film-pretendent na Oskar-2019 ad Biełarusi, udzielnik IDFA (Amsterdam), łaŭreat Krakaŭskaha kinafiestyvalu
U papraŭčaj kałonii ŭ centry Homiela adbyvajuć pakarańnie paŭtary tysiačy žančyn. Siudy traplajuć tolki tyja, chto parušyŭ zakon ŭpieršyniu. Nie stracić siabie dapamahajuć tolki repietycyi turemnaha teatra…
9 krasavika — «Lebiedzi»
2018, režysior — Halina Adamovič
Biełaruskaja fiestyvalnaja premjera, film-udzielnik «Artdokfesta» (Maskva)
«Lebiedzi» — pracoŭny pazyŭny chutkaj dapamohi ŭ Śvietłahorsku. Mienavita jany pieršymi sutykajucca z raptoŭnymi zachvorvańniami, niaščasnymi vypadkami i traŭmami…
10 krasavika — «Pierazimavać»
2017, režysior — Jeva-Kaciaryna Machava
Film-udzielnik fiestyvalaŭ «Artdokfest»(Maskva) i «Listapad» (Minsk), naminant na premiju «Łaŭr»
Biełaruś, Vilejski rajon Minskaj vobłaści. Samotnyja staryja viaskoŭcy adjaždžajuć na zimu ŭ dom siezonnaha pražyvańnia. Kožny ź ich maje svoj układ, svoj žyćciovy vopyt, ale zimavać treba razam. Dni ciahnucca ŭ chvarobach, razmovach, uspaminach, sumiesnych teleprahladach… Pasiarod zimy pryjazdžaje novy žychar, i atmaśfiera ŭ domie źmianiajecca.
11 krasavika — «Car hary»
2017, režysior — Andrej Kuciła
Film-udzielnik fiestyvalaŭ «Artdokfest» (Maskva) i «Listapad» (Minsk), pieramožca fiestyvalu «Golden Beggar» (Košyce, Słavakija)
Biełaruski videabłohier i małady sielanin Siamion, pravasłaŭny viernik, zaŭsiody mieŭ fiłasofskija dumki pra žyćcio, zachaplaŭsia matuchnaj-pryrodaj dy dzialiŭsia hetym z usim śvietam. Užo piać hadoŭ jon z žonkaj i dvuma synami žyvie ŭ vioscy, haduje aviečak. Zdavałasia b, radasnamu, harmaničnamu isnavańniu ŭ hłušy ničoha nie moža pieraškodzić…
12 krasavika — «Falkłor i žyćcio»
2020, režysior — Juryj Cimafiejeŭ
Nacyjanalnaja premjera filma
Falkłor źjaŭlajecca adlustravańniem čałaviečaha isnavańnia, tolki ŭ vobraznaj, mietafaryčnaj formie. Nie vyklučeńnie tut i eratyčny składnik žyćcia. Abrady z eratyčnym padtekstam u našych prodkaŭ byli padrychtavany da kožnaha śviata i ciesna źnitavany z paniaćciem uradlivaści…
13 krasavika — «Połacki vals»
2019, režysior — Volha Dašuk
Biełaruskaja fiestyvalnaja premjera, film-udzielnik mižnarodnych kinafiestyvalaŭ
Vasilu Hranoŭskamu 58 hod. Jon žyvie ŭ vioscy i kiruje miascovym choram, usie śpievaki ŭ jakim staryja. Harmonik Vasi taksama stary, u im brakuje niekalki kłaviš. Vasieva mašyna, u jakoj jon zvyčajna vozić svaich artystaŭ, nie zusim spraŭnaja i nie zaŭsiody zavodzicca.
Sioleta anłajn-fiestyval upieršyniu abviaščaje niefarmalnuju ŭznaharodu za film, abrany praz hałasavańnie hledačoŭ, — «Pryz hladackich simpatyj». Siabram žury moža stać kožny: dastatkova zapoŭnić ankietu pa spasyłcy, pahladzieć usie filmy prahramy i acanić ich.
Anłajn-fiestyval BelarusDocs — niekamiercyjny prajekt, isnavańnie jakoha možna padtrymać na kraŭdfandynhavaj placoŭcy «Tałaka».
