Bolšaść tych, chto zaraziŭsia novym karanavirusam, — 80% — pieranosiać chvarobu ŭ lohkaj formie, adznačaje ria.ru. Jak nie prapuścić pačatak niebiaśpiečnaj chvaroby i pravilna vyznačyć jaje simptomy?
Nośbit infiekcyi zarazny
Toje, što ŭ zdarovych darosłych infiekcyja prajaŭlajecca słaba, navukoŭcy ličać adnoj z hałoŭnych pryčyn jaje chutkaha pašyreńnia. U dziaciej COVID-19 u bolšaści vypadkaŭ naohuł praciakaje praktyčna bieśsimptomna. Hetyja katehoryi ludziej, sami nie chvarejučy vidavočnaj formaj, mohuć stać pieranosčykami. Epidemija ŭ Niamieččynie pačałasia mienavita z takoj pieradačy.
Jak raspaznać chvarobu
Ahulnyja charakternyja simptomy COVID-19 — padvyšanaja tempieratura, kašal (zvyčajna suchi abo ź nievialikaj kolkaściu makroty), dychavica, adčuvańnie zdušanaści ŭ hrudnoj kletcy. Časam mohuć być prykmiety vostraj sinusavaj infiekcyi abo lohkaha ahulnaha pačućcia chvaroby bieź lichamanki. Pry lohkaj formie zachvorvańnia simptomy prachodziać praz tydzień ci dva, pry ciažkich vypadkach mohuć praciahvacca šeść i bolš tydniaŭ.
Lohkaja forma COVID-19
Nievialikaja tempieratura, słaby hałaŭny bol, padvyšanaja stamlalnaść, balučyja adčuvańni ŭ horle, pakašlivańnie, bol u ciahlicach, lohkija simptomy prastudy, blednaść, dryžyki. Redka nasmark.
Jak nie zbłytać COVID-19 z VRVI abo prastudaj
Pry VRVI i prastudzie, u adroźnieńnie ad COVID-19, kašal mokry, a nie suchi i zaŭsiody jość zakładzienaść nosa i nasmark. Z padobnych simptomaŭ — nievialikaje pavyšeńnie tempieratury i hałaŭny bol ad lohkaha da ŭmieranaha.
Jak nie zbłytać COVID-19 z hrypam
Pry hrypie nie byvaje dychavicy abo inšych prablem z dychańniem, a tempieratura amal zaŭsiody vysokaja, u adroźnieńnie ad COVID-19.
Faktary ryzyki
Da padazronych simptomaŭ adnosiacca lubyja kliničnyja prajavy VRVI, branchitu ci pnieŭmanii ŭ spałučeńni z epidemijałahičnym anamniezam. Heta:
1) naviedvańnie za 14 dzion da źjaŭleńnia simptomaŭ epidemijałahična niespryjalnych pa COVID-19 krain i rehijonaŭ;
2) ciesnyja kantakty za apošnija 14 dzion z asobami, jakija chvarejuć na COVID-19 abo ŭ jakich łabaratorna paćvierdžany hety dyjahnaz;
3) ciesnyja kantakty za apošnija 14 dzion z asobami, jakija znachodziacca pad nahladam u suviazi z novym karanavirusam SARS-CoV-2.
U lubym z hetych vypadkaŭ pry źjaŭleńni navat lohkich simptomaŭ prastudy, infiekcyi varta vyklikać doktara na dom i nie zajmacca samalačeńniem.
Niezvyčajnyja simptomy COVID-19 u Hiermanii
Niamiecki virusołah Chiendryk Stryk, jaki naziraŭ praktyčna ŭsich pieršych pacyjentaŭ, chto zachvareŭ na COVID-19 u Hiermanii, u intervju haziecie Frankfurter Allgemeine Zeitung raspavioŭ pra svoj vopyt. Na jaho dumku, typovy pacyjent COVID-19 pakazvaje tolki lohkija simptomy. Typovyja suchi razdražnialny kašal i nievialikaja lichamanka, u 30 % infikavanych adznačałasia dyjareja.
Sustrakalisia i vielmi niezvyčajnyja prykmiety: prykładna dźvie traciny tych, chto zachvareŭ kazali pra parušeńnie zvykłaha ŭsprymańnia pachaŭ i smakaŭ na praciahu niekalkich dzion. Usio heta śviedčyć pra toje, što ŭ pacyjentaŭ z Hiermanii virus SARS-CoV-2 pašyraŭsia nie tolki ŭ lohkich, ale i ŭ straŭnikava-kišačnym trakcie.
