Novy paŭnakupalny film papoŭniŭ afišu Minskaha płanietaryja. Śfieryčnaja animacyjnaja stužka «Daloka ad sonca» źjaŭlajecca padarunkam ispanskaj studyi Render Area. Dziakujučy joj, film zastaniecca ŭ afišy płanietaryja na dva hady i budzie ekspanavacca tolki na biełaruskaj movie.
Hety jaskravy multfilm zacikavić dziaciej ad šaści hadoŭ i ich baćkoŭ. U centry fantastyčnaj historyi: maleńkaja dziaŭčynka Sialesta choča daśledavać Suśviet, pakul jana zmahajecca sa snom u svaim pakoi čytańniem knihi pa astranomii, jaje niečakana naviedvaje sam Miesiac. Razam jany padarožničajuć pa Suśviecie i daviedvajucca, što takoje ekzapłaniety i jak ich možna znajści. Jany nazirajuć płaniety-izhoi, akijaničnyja śviety i supierziemli. Miesiac raspaviadaje pra palaŭničych na ekzapłaniety, jakija nazirajuć za niebam u pošukach takich płaniet, jak Ziamla.
«Daloka ad Sonca» — adzin z najlepšych animacyjnych filmaŭ konkursnaj prahramy I Minskaha mižnarodnaha fiestyvalu paŭnakupalnych filmaŭ, jaki zaniaŭ druhoje miesca ŭ rejtynhu hałasavańnia hledačoŭ.
Paśla prahladu krychu mienš čym paŭhadzinnaha filma možna jašče piatnaccać chvilin prosta nazirać za zornym niebam.
Biełaruskamoŭny dublaž dla karciny zrobleny z udziełam akcioraŭ Iny Hančar i Ihara Sidorčyka. Darečy, heta nie pieršaja stužka na rodnaj movie ŭ afišy płanietaryja. Pierastvareńniem paŭnakupalnych filmaŭ pa-biełarusku tut zajmajucca ciaham apošnich dvuch hadoŭ. Filmy «Myšaniaty i Miesiac» i «Majia. Naziralniki Suśvietu» źjavilisia ŭ afišy letaś. A niadaŭna sumiesna z kampanijaj «Kinakonh» byŭ zrobleny dublaž «Roznakalarovaha Suśvietu» — adnaho z samych jaskravych i papularnych filmaŭ u płanietaryi.
