Kapotny MAZ pad kiravańniem Siarhieja Viazoviča staŭ trecim pa vynikach rali-rejdu «Dakar-2020». Druhi raz u historyi biełaruski ekipaž akazvajecca na pjedestale samaha prestyžnaha aŭtamarafona ŭ śviecie, paviedamlaje pres-słužba AAT «MAZ».
Dla kapotnika honka stała debiutam na «Dakary», što prachodziŭ u piaskach Saudaŭskaj Aravii. Biełarusy irvanuli napierad ź pieršych kiłamietraŭ: zaniali druhoje miesca na pačatkovym etapie i išli lidarami dva nastupnyja zajezdy. Paśla hetaha inicyjatyva pierajšła da rasijskich ekipažaŭ, jakija «advajavali» pieršyja dva miescy i pastupova pavialičyli adryŭ.
U vyniku MAZ Siarhieja Viazoviča apynuŭsia na pjedestale z hanarovaj bronzaj. Pieramožcam marafonu staŭ rasijanin Andrej Karhin, na druhim miescy — jaho partnior pa kamandzie Anton Šybałaŭ. Da najlepšaha vyniku biełarusam nie chapiła kala 2 hadzin. Za treciaje miesca členam ekipaža taksama naležać «Załatyja bieduiny» - lehiendarnyja statuetki dla pieramožcaŭ i pryzioraŭ «Dakara».
Samym paśpiachovym dla biełarusaŭ staŭ «Dakar 2018». Tady Siarhiej Viazovič zavajavaŭ srebra prestyžnaha rali-rejdu. U tym ža hodzie jon pryjšoŭ pieršym na Turkmen Desert Race. A prykładna praz hod staŭ čempijonam Morocco Desert Challenge.
Udzieł u «Dakary», akramia spartyŭnych metaŭ, pieraśledavaŭ i inšyja zadačy. Mnohija kanstruktarskija nou-chau prajšli vyprabavańnie ŭ «bajavych» umovach, što daść mahčymaść udaskanalić i sieryjnuju vytvorčaść hruzavikoŭ. Paśpiachovyja vystupleńni taksama spryjalna adbivajucca na imidžy MAZ va ŭsim śviecie.
