«Mnie 27 hadoŭ. Ja naradziŭsia i vyras va ŭkrainskim Krymie ŭ maleńkaj vioscy. Moj baćka — biełarus, maci — ukrainka. Usio žyćcio nie moh znajści sabie miesca, i tolki ciapier razumieju, što znajšoŭ: Biełaruś, Minsk!
U Biełarusi ŭ mianie šmat radni. Paru razoŭ byvaŭ na radzimie baćki, ale nie bolš. Zaŭsiody było žadańnie pahladzieć usiu krainu, pabyvać u stalicy.
Z časam u mianie vostra paŭstała pytańnie, što treba ŭžo kančatkova pakidać baćkoŭskaje hniazdo i vybirać horad, jaki ja budu lubić.
Paźniej ja daviedaŭsia, što, jak syn biełarusa, ja mahu paskorana atrymać hramadzianstva Biełarusi! Vaŭ!
Hetuju ideju ja vynošvaŭ 5 hadoŭ da hetaha momantu. Naźbiraŭ hrošaj i pajechaŭ naŭprost ažyćciaŭlać daŭniuju maru — prakacicca pa Biełarusi, a zaadno dla siabie zrazumieć, ci chaču ja tut zastavacca žyć i daviedacca ŭ AHIM, mahu ja stać sapraŭdnym biełarusam z pašpartam ci nie)) U vyniku ŭsio skłałasia! Ja padarožničaŭ pa Biełarusi. Minsk, Brest, Mazyr, Homiel, baćkoŭski pasiołak. Ubačyŭ dosyć, ale nie chapiła Hrodna, Viciebska i Lidy… naviarstaju!
Skažu ščyra: lacieŭ ja ź vialikim skieptycyzmam, dumaŭ, što rasčarujusia, što mnie nie spadabajecca Biełaruś… jak ža ja rady, što pamylaŭsia!))
Jak tolki ja prylacieŭ u aeraport i syšoŭ z trapa samalota, ja adčuŭ, što ja narešcie doma! Ja na radzimie! Kali pryjechaŭ užo ŭ sam Minsk na rejsavym aŭtobusie — heta pačućcie tolki ŭzmacniłasia!
Usio, što chacieŭ daviedacca, — daviedaŭsia. Što chacieŭ pabačyć — ubačyŭ. Vysnovy zrabiŭ. Rašeńnie pryniaŭ! Biełaruś — heta maja kraina. Kraina, adkul maje karani. I jana mnie padabajecca! Ja chaču tut žyć! Tut vydatnyja ludzi!
Tak, šmat prablem, ale ŭsie jany vyrašalnyja, kali vyrašać! Uvohule, usie sumnievy raźviejalisia ŭ pieršuju ž hadzinu znachodžańnia tut. A praz dva dni ja ŭžo dakładna viedaŭ, što ja siudy jašče viarnusia i ŭžo viarnusia ź biletam u adzin kaniec!
Tak i vyjšła. Ja viarnuŭsia ŭ Minsk u pačatku žniŭnia z rečami. Padaŭ dakumienty na hramadzianstva, praces zapuščany. Chutka ja budu pisać admovu ad rasijskaha hramadzianstva na karyść biełaruskaha!
I ja spadziajusia, što svaje 28 hadoŭ sustrenu paŭnavartasnym biełarusam! Nie chapaje tolki bieł-čyrvona-biełaha ściaha!)
Taksama pačaŭ aktyŭna sačyć za biełaruskimi navinami, znajšoŭ u Jutubie paru cikavych błohieraŭ, adzin ź jakich i raspaviadaŭ u svaim błohu pra kramu Symbal.by. U krasaviku jakraz-taki pieršy raz da vas zachodziŭ i nabraŭ suvieniraŭ dla svaich krymčan))) Trochi paznajomiŭsia z historyjaj VKŁ i jaje simvałami: Kalumny, Pahonia. Hetak ža ścisła z historyjaj BNR i bieł-čyrvona-biełym ściaham. Adkryŭ dla siabie novych biełaruskich vykanaŭcaŭ!
A na kancercie, pryśviečanym 5-hodździu Symbal.by, haniaŭ pad Dzieciuki i razam z chłopcami trymaŭ b-č-b susieda! Spadziajusia, vam maja historyja spadabałasia, i ŭ nastupny raz na kancert ja pryjdu sa svaim ułasnym bieł-čyrvona-biełym ściaham!
Ja hanarusia tym, što ja biełarus!» — napisaŭ Piatro Papčanka.
