Hanna Kiškurna.
«U Karei na ciabie, śvietłavałosuju błandzinku, nichto nie źviartaje ŭvahi, jak, naprykład, u Kitai. Kab być pryhožaj pa-karejsku, treba šmat sił, hrošaj i času», — uvodzić u temu Hanna Kiškurna. Usia praŭda pra karejcaŭ — u raspoviedzie biełaruski.
Makijaž
Makijaž u karejanak nie jarki. Vusny, naprykład, jany farbujuć tolki častkova, nanosiać jarkuju pamadu byccam znutry, na samuju siaredzinu vusnaŭ. Vielmi papularnyja rumiany: karejanki robiać ščoki jarka-ružovymi, što mocna kidajecca ŭ vočy. A voś vočy farbujuć śvietłymi ružovymi cieniami. Mohuć padkreślić ich nakładnymi viejkami. Darečy, naraścić viejki ŭ Karei kaštuje kala 40 dalaraŭ (u Minsku siaredniaja cana — 25 dalaraŭ, ci kala 50 rubloŭ), tamu hetaja pasłuha nie karystajecca asablivaj papularnaściu. I, jak mnie zdajecca, karejanki nie karystajucca tuššu.
Pryčoski ŭ žančyn amal adnolkavyja — pramyja doŭhija vałasy z karotkaj hryŭkaj. Pryčym modna, kali hryŭka zakručanaja. Tamu mnohija karejanki pa vulicach chodziać ź bihudziami na čubie. Cyrulniaŭ u Karei vielmi šmat, u adnym domie ich moža być niekalki.
Dohlad skury
Karejskija maski.
Amal usie kremy, jakija pradajucca ŭ Karei, zroblenyja z akcentam na adbielvańnie. Karejcy chočuć mieć idealnuju śvietłuju skuru. Zahar tam nie modny, žaŭcizna skury taksama. Što datyčycca kolkaści kramaŭ, u jakich pradajuć kaśmietyku, to ich sapraŭdy bieźlič.
Cikava, što tut možna znajści srodki pa dohladzie absalutna luboj častki cieła: ad končykaŭ vałasoŭ — da patčaŭ pad pryščyk na levaj ščace. Pryčym, kali ty kuplaješ adzin krem ci šampuń, tabie ŭ padarunak daduć ceły pakiet roznych probnikaŭ.
Praŭda, Hanna Kiškurna kaža, što na sabie cudadziejnaha efiektu karejskaj kaśmietyki nie zaŭvažyła. «Ni ad kremaŭ, ni ad šampuniaŭ vaŭ-efiektu nie było. Ja dumaju, što tut treba razumieć, što karejskaja kaśmietyka naohuł moža nie padychodzić pad typ našych vałasoŭ i skury», — kaža jana.
Hanna — naturalnaja błandzinka ź miakkimi vałasami, tamu i šampuni ŭ Biełarusi abiraje admysłovyja. U Karei ž dziaŭčyna kuplała tyja, u jakich spadabałasia ŭpakoŭka. «Ja nie skažu, što jany drennyja, ale z maich doŭhich vałasoŭ vymyvalisia ź ciažkaściu.
A kremy? Nu toje samaje. Nie mahu skazać, što ad vykarystańnia ich pračynałasia na ranicu maładziejšaj na 10 hadoŭ», — kaža jana.
Hanna kaža, što karejskaj kaśmietycy, jakoj jana karystałasia, biełaruskaja mała ŭ čym sastupaje. Naturalna, naša bolš dastupnaja i biaśpiečnaja ŭ tym sensie, što ŭ Biełarusi sama sistema kantrolu bolš składanaja. Skład srodkaŭ doŭha vyviarajecca i paśla nie mianiajecca, jaho lohka rasčytać — heta nie ijerohlify. U Karei ž dziejničajuć praściejšyja miechanizmy vyrabu kaśmietyki, skład srodkaŭ vytvorca pry žadańni moža ad partyi da partyi źmianiać.
Cikava, što biełaruskija brendy ŭžo pačali vykarystoŭvać karejskija «recepty pryhažości» i stvarać na bazie ich alternatyŭnyja. Naprykład, jość padobnyja da karejskich srodkaŭ sieryi kremaŭ ad Bielity-M. Niekalki hadoŭ tamu vyjšła ŭvilhatnaja sieryja ŭ piaščotna-ružovaj upakoŭcy z mucynam ślimaka.
Prosta ciapier źjaviłasia sieryja srodkaŭ pa dohladzie tvaru EGCG Korean Green Tea Catechin. U kramach jaje lohka identyfikavać pa naturalnym zialonym kolery, što nahadvaje čajnaje liście. Stvoranaja jana na asnovie japonskaj harbaty matcha i kancentravanaj siły čatyroch kampanientaŭ karejskaj zialonaj harbaty.
«Adzinaje, što mnie spadabałasia ŭ Karei, — heta bieźlič masak dla tvaraŭ na niatkanaj asnovie. Vielmi zručna imi karystacca, vielmi pryjemnyja adčuvańni. Ale, znoŭ-taki, u biełaruskich kramach źjaŭlajucca i našy padobnyja maski, tamu nie baču sensu haniacca za karejskimi», — raspaviadaje Hanna.
Ceny na kaśmietyku ŭ Karei vielmi adroźnivajucca.
«Masku dla tvaru možna kupić i za 1 dołar, i za 50. Vielmi darahimi srodkami ja nie karystałasia, moža tamu nie adčuła ŭsie asablivaści karejskaj kaśmietyki», — nie vyklučaje Hanna.
Płastyčnaja chirurhija
Karejcy varjaciejuć ad płastyčnaj chirurhii. Tut modna pierarablać sabie ŭsio: vusny, skuły, padbarodździe, razrez vačej. Moda na napampavanyja vusny datyčycca i mužčyn. Tak, u Karei mužčyna, jaki nie adnojčy traplaŭ u ruki da płastyčnych chirurhaŭ, — heta nie redkaść.
Fota aSuruwataRi, Shutterstock.
Ciapier u Karei vielmi papularny ruch K-pop (Korean pop). Spačatku heta byŭ prosta muzyčny žanr, sumieś pop-muzyki, chip-chopu, rytm-en-bluza, ale siońnia kiej-pop staŭ sapraŭdnaj fabrykaj pryhažości. U śviecie miljony fanataŭ hetaj subkultury. Vykanaŭcy kiej-popu stanoviacca kumirami i ŭzorami dla pierajmańnia. U Karei paŭsiul adkryvajucca škoły kiej-popu. Trapić tudy vielmi składana, ale kali tabie pašancuje, ź ciabie zrobiać sapraŭdnuju zorku. U hurtoŭ, jakija vykonvajuć muzyku ŭ styli kiej-pop, prosta šalonyja prahlady na jutubie. Naprykład, chłapčukovy hurt BTS. Hledziačy na ich, lohka zrazumieć, da jakoha etałonu pryhažości imkniecca moładź: čystyja dziciačyja tvary, biełaja skura, farbavanyja vałasy, tonkaje cieła, nijakaha namioku na ŭzrost.
Hety klip BTS, darečy, za dva miesiacy sabraŭ 414 miljonaŭ prahladaŭ.
Adzieńnie
Fota Travel man, Shutterstock.
Što mianie bolš za ŭsio ździviła ŭ Karei, dyk heta toje, što tam zabaroniena prymiarać adzieńnie ŭ kramach. Nie važna jakoje: štany, sukienku ci kurtku. Nielha. Prymieračnych tam u pryncypie niama.
Mahčyma, karejcy daskanała viedajuć svoj pamier. Ciapier vielmi modnyja doŭhija, maksimalna zakrytyja sukienki, jak u rasijskich huviernantak 19 stahodździa. Na adzieńni ŭ karejanak šmat rušaŭ, karunkaŭ. Vielmi lubiać kapialušyki. Abcasy tam nie nosić nichto. Usie pierasoŭvajucca chutka i ŭ zručnym abutku.
Staŭleńnie da sportu
Fota mentatdgt, Shutterstock.
U Karei ŭ spartyŭnyja zały chodziać adny staryja. U parkach biehajuć taksama pieravažna ludzi stałaha vieku. U moładzi absalutna adsutničaje kult cieła. U Karei amal nie sustrenieš «kačkoŭ». Pry hetym poŭnych ludziej tam taksama nie šmat: chudzieńkija i mužčyny, i žančyny. Moža, tamu i vielmi ciažka zrazumieć, kolki hadoŭ tvajmu surazmoŭcu. I heta pry tym, što pajeści karejcy lubiać. Na vulicach šmat punktaŭ z vuličnaj ježaj. Karejcy jaduć łokšynu, užyvajuć šmat miasa. Jak im udajecca zachoŭvać fihuru — zahadka.
Što karejcy viedajuć pra Biełaruś?
Siarod tych ludziej, z kim ja razmaŭlała pra Biełaruś, tolki adsotkaŭ dziesiać mahli skazać, što viedajuć nas pa futbole i jak krainu byłoha SSSR. I nie tamu, što naša kraina nie vielmi papularnaja. Prosta karejcy dosyć zakrytyja ludzi. Mnohija i za miažu nikoli nie vyjazdžali.
Jany słuchajuć tolki karejskuju muzyku. Byvaje, pytaješsia ŭ ich pra niejkaha, jak mnie zdajecca, suśvietna viadomaha śpievaka, a jany pra takoha navat nie čuli.
Usie karejcy varjaciejuć ad Paryža, i, jak mnie zdajecca, ź jeŭrapiejskich haradoŭ viedajuć tolki jaho.
Što pryviezła z suvieniraŭ? Zachapiła ŭ Biełaruś niekalki masak dla tvaru. I toje tamu, što siabroŭki vielmi prasili. Ja ž dumaju, što naša kaśmietyka ni čym nie horšaja, svajo ŭsio ž bližejšaje da skury.
A Kareja? Zapomniu jaje jak samabytnuju, niepadobnuju ni na jakuju inšuju, ale pry hetym absalutna nie maju krainu.
