KDB 4 maja raspaŭsiudziŭ paviedamleńnie ab zatrymańni hienieralnaha dyrektara RUP «Biełtelekam» Siarhieja Sivadziedava, «jaki atrymaŭ chabar za sadziejničańnie ŭ pastaŭkach telekamunikacyjnaha abstalavańnia pamieram 15 000 jeŭra». U ramkach śledstva pa kryminalnaj spravie pa art. 430 i 431 KK u jakaści abvinavačanaha pryciahnuty i chabaradavalnik — hramadzianin Rasii K.
Jak daviedaŭsia Office Life, hramadzianin Rasii K. — heta Uładzimir Kazancaŭ, žychar Jekaciarynburha. Jamu 49 hadoŭ. Zaraz chatni telefon Uładzimira Kazancava nie adkazvaje.
Niekalki hadoŭ tamu Kazancaŭ kiravaŭ Uralskim filijałam kampanii «Envižn Hrup». U intervju časopisu «Čałaviek hoda» ŭ 2012 hodzie jon raspaviadaŭ ab prajektach kampanii: raspracoŭkach infarmacyjnych praduktaŭ dla bankaŭskaj śfiery, sotavaj suviazi, atamnaj enierhietyki, dziaržaŭnych orhanaŭ i siłavych struktur.
U kampanii «Envižn-Urał» Office Life raspaviali, što spadar Kazancaŭ nie pracuje prykładna z 2015 hoda.
U 2017 hodzie Kazancaŭ «zaśviaciŭsia» siarod udzielnikaŭ IX Mižnarodnaha IT-forumu ŭ Chanty-Mansijsku jak pradstaŭnik TAA «Aj Ci Chors» (Jekaciarynburh).
U krasaviku 2018 hoda Kazancaŭ udzielničaŭ u XVIII Usierasijskaj naradzie «Enierhaefiektyŭnaść 2.0. — Ličbavy viektar». Jaho pasada ŭkazanaja jak namieśnik dyrektara pa pracy ź dziaržaŭnymi i karparatyŭnymi siehmientami jekaciarynburhskaha filijała PAA «Rastelekam». U «Rastelekamie» paviedamili, što «taki čałaviek nie pracuje ŭ kampanii z kanca 2018 hoda».
Nahadajem, u domie eks-kiraŭnika «Biełtelekama» Sivadziedava kanfiskavana $470 tysiač. Nakładzieny aryšt na try kvatery ŭ Minsku, u tym liku aformlenyja na padstaŭnych asob, a taksama ziamielny ŭčastak z žyłym domam u Minskim rajonie.
Paviedamlajecca, što abvinavačanyja supracoŭničajuć sa śledstvam.
