Pavieł Sieviaryniec vychodzić z turmy, 20 krasavika. Na fota: z žonkaj i synam. Fota Arcioma Lavy.
Adnaho z kiraŭnikoŭ Chryścijanskaj demakratyi, palityka i piśmieńnika Paŭła Sieviarynca vyklučyli ź Biełaruskaha PEN-Centra. Aficyjnaja pryčyna — niaspłata ŭnioskaŭ.
Sieviaryniec kaža, što daviedaŭsia pra heta 22 krasavika, kali byŭ na ofisie pravaabaroncaŭ-viasnoŭcaŭ. Jon paličyŭ heta za pamyłku, ale napisaŭ list kiraŭnictvu PENa, kab spraŭdzić, ci heta praŭda. Akazałasia, što praŭda.
Pavieł Sieviaryniec byŭ pryniaty ŭ PEN-Centr u 2007 hodzie, kali adbyvaŭ pakarańnie «chimijaj» u Małym Sitnie Połackaha rajona. Za knihu «Listy ź lesu», apublikavanuju ŭ sieryi «Kniharnia «Naša Niva», jon atrymaŭ PEN-centraŭskuju premiju imia Alesia Adamoviča. Prymać Sieviarynca ŭ arhanizacyju pryjazdžali Uładzimir Niaklajeŭ, Uładzimir Arłoŭ, Barys Piatrovič, Lavon Barščeŭski.
Pavieł Sieviaryniec raskazaŭ «NN», što paŭhoda tamu na prapanovu spłacić unioski adkazaŭ nastupnym listom: «Siabry, vitaju. Nakont siabroŭskich unioskaŭ: paśla vystavy kaminh-aŭtaŭ u ofisie PENu i mierapryjemstvaŭ, źviazanych z prapahandaj hamaseksualnaha ładu žyćcia pad ehidaj arhanizacyi ja pryncypova niekalki hadoŭ nie płaču ŭnioski. Ja chryścijanin i nie baču dla siabie mahčymaści padtrymlivać, u tym liku finansava, takija rečy — ja adkryta kazaŭ pra heta na minułahodnim źjeździe.
Kali zaraz situacyja źmianiłasia i padobnaj rekłamy vyčvareńniaŭ Uprava PEN ŭ dalejšym dapuskać nie budzie — paviedamicie, tady možna havaryć pra ŭnioski. Žyvu ja za knižki, paviercie, vielmi ścipła, nijakich hrantaŭ nie maju — i chaču być upeŭnienym, što niemałyja dla mianie hrošy, adarvanyja ad biudžetu maładoj siamji, nie pojduć na kiepskuju spravu».
«Pryčakali Kurapataŭ, Vialikadniu — i, značyć, usmažyli. Što ž. Tam Łukašenka z kryžałomam ci na «Linii Stalina», tut nienaviśniki chryścijanstva», — adznačyŭ Sieviaryniec.
Sieviaryniec nie płaciŭ unioski ad 2014 hoda. Ahułam jon byŭ vinien za hety čas 183 rubli.
Staršynia PEN-Centra Taćciana Niadbaj prakamientavała «Našaj Nivie» situacyju z vyklučeńniem Paŭła.
My pacikavilisia, ci tolki adzin Sieviaryniec byŭ vyklučany z arhanizacyi i čamu jon nie byŭ zaprošany na pasiedžańnie, dzie heta adbyvałasia.
«Pavieł Sieviaryniec — nie adziny, chto byŭ vyklučany, — zapeŭnivaje spadarynia Niadbaj.
— Biełaruski PEN — čalec Mižnarodnaha PENa i pavinien štohod spłočvać svaje ŭnioski ŭ hetu arhanizacyju, ich pamier zaležyć ad kolkaści našych siabraŭ. Takim čynam, kali niejkija siabry arhanizacyi nie płaciać unioskaŭ, to za ich pavinien zapłacić niechta inšy.
Pavieł ža vyrazna abaznačyŭ svaju pryncypovuju pazicyju nie spłočvać, pakul my nie paabiacajem, što «padobnaj rekłamy vyčvareńniaŭ [vystavy kaminh-aŭtaŭ] Uprava PEN ŭ dalejšym dapuskać nie budzie». Hetaha paabiacać nie možam, i ŭ acency padobnych dziejańniaŭ z Paŭłam kardynalna razychodzimsia.
Pavodle Mižnarodnaj chartyi (jakuju, darečy, pa vyznačeńni padzialajuć usie siabry PENa): «siabry PEN-kłuba musiać zaŭsiody vykarystoŭvać svoj upłyŭ dziela ŭmacavańnia ŭzajemnaha razumieńnia i pavahi pamiž ludźmi i nacyjami, usimi siłami zmahacca suprać lubych prajavaŭ nianaviści i adstojvać ahulnačałaviečyja ideały miru i roŭnaści na ziamli». U toj ža čas Statut Biełaruskaha PENu havoryć: «3.1. Členami RHA «Biełaruski PEN-centr» mohuć być biełaruskija piśmieńniki i žurnalisty, jakija: a) pryznajuć hety Statut, Statut Mižnarodnaha PEN-kłuba i jaho Chartyju, abaviazvajucca vykonvać ich patrabavańni. Parušeńnie hetaha punkta niesumiaščalnaje z členstvam u RHA «Biełaruski PEN-centr» i dalej: «3.8. Kožny člen RHA «Biełaruski PEN-centr» abaviazany: a) płacić štohadovyja ŭznosy ŭ pamiery, jaki vyznačajecca Radaj, na finansavańnie dziejnaści RHA «Biełaruski PEN-centr». Statut jość na sajcie PENa, jak i Chartyja — luby achvočy moža aznajomicca z hetymi dakumientami.
Rašeńnie było składanym i nie było adzinahałosnym. My abmiarkoŭvali heta ciaham niekalkich sustreč Rady i dasyłali Paŭłu nie adzin list. My vysoka cenim zasłuhi Sieviarynca pa abaronie Kurapat, ale jahonaja biez sumnievu značnaja i samaachviarnaja dziejnaść nie źjaŭlajecca tut pradmietam abmierkavańnia. Tut my majem śviadomaje i adkrytaje parušeńnie Statuta arhanizacyi.
Pry hetym Pavieł sam zajaviŭ, što nie hatovy padtrymlivać arhanizacyju, a siabroŭstva ŭ joj — na maju dumku — heta taksama padtrymka. Być siabram arhanizacyi — značyć, padzialać jaje kaštoŭnaści. Ja nie maju adkazu na pytańnie, čamu sam Pavieł nie zachacieŭ vyjści z arhanizacyi, dziejnaść jakoj jamu nie padabajecca», — napisała nam Taćciana Niadbaj.
«Ja asabista Paŭłu skazała, što niahledziačy na heta my praciahvajem adsočvać situacyju ź jaho zatrymańniami i infarmavać pra heta mižnarodnuju supolnaść. Taksama ja asabista baču svajoj zadačaj zrabić u PENie sistemnym adsočvańnie parušeńniaŭ pravoŭ litarataraŭ (nie tolki siabraŭ PENa) i kulturnych pravoŭ naohuł. Bolš za toje, dla šortlistaraŭ Hiedrojca (a Pavieł adzin ź ich) budzie rychtavacca pajezdka ŭ Polšču na knižny fiestyval, a taksama płanujem zapisać šeść aŭdyjaknih — heta ŭsie prajekty, u jakich, spadziajusia, Pavieł budzie ŭdzielničać, chiba tolki sam zachoča admovicca. Chaču padkreślić, što Pavieł nie «vykinuty» z prajektaŭ i pra heta navat nie było havorki.
Zaprašeńnie na praceduru vyklučeńnia statutam nie praduhledžanaje», — napisała Taćciana Niadbaj.
Sieviaryniec patłumačyŭ, što nie vychodziŭ sam z PEN-Centra, bo ličyć, što bolšaść jaho siabroŭ «dobrymi ludźmi». «Ale nievialikaja ahresiŭnaja hrupa padmiała pad siabie ŭsio», — adznačaje palityk.
Biełaruski PEN-Centr byŭ zasnavany ŭ 1989 hodzie. La jaho vytokaŭ stajali Vasil Bykaŭ, Karłas Šerman, Ryhor Baradulin i inšyja.
Spłata ŭnioskaŭ nacyjanalnym PEN-Centram u Mižnarodny PEN daje prava hołasu na suśvietnych kanhresach PEN-Kłuba. Pry niekatorych raniejšych kiraŭnikach arhanizacyi Biełaruski PEN prosta ŭstrymlivaŭsia ad apłaty hetych unioskaŭ i ŭdzielničaŭ u suśvietnych kanhresach biez prava hołasu. «Nijakich pryncypovych rašeńniaŭ na tych kanhresach i nie prymajecca, a mnohija biełaruskija piśmieńniki ličać udzieł u hetych kanhresach małaznačnym dla biełaruskaha hramadstva i litaratury», — adznačyŭ adzin z byłych kiraŭnikoŭ arhanizacyi.
